Қытайдың Чжэцзян провинциясында Ханчжоу мен Цюйчжоу аралығында жаңа жоғары жылдамдықты теміржол желісі тест режимінде іске қосылды, деп жазды Синьхуа. 

Сынақ мерзімі – 1 ай. Егер жоба сәтті болса, ол 2025 жылғы желтоқсанның соңында толықтай іске қосылады. 

"Ханчжоу – Цюйчжоу жоғары жылдамдықты теміржолы провинция орталығын Чжэцзянның батысындағы Цюйчжоу қаласымен байланыстырады. Магистральдың ұзындығы 131 шақырымды құрайды, ал пойыздардың жобалық жылдамдығы – сағатына 350 шақырым. Жобаны қаржыландыру және EPC үлгісі бойынша (жобалау, жабдықтау және құрылыс) жүзеге асыру консорциумға тапсырылған, оған Қытай теміржол құрылыс корпорациясының Төртінші жобалау-зерттеу институты жетекшілік етеді. Инвестицияның негізгі бөлігі мемлекеттік капитал есебінен бөлінген", – делінген Синьхуаның хабарламасында. 

Фото: Синьхуа агенттігі

Жол бойында 38 туннель мен 119 көпір салынған, олар жалпы ұзындықтың 78,7 пайызын құрайды. Құрылыстың ең маңызды нысандарының бірі – ұзындығы 685 метр болатын көпір.

Жол ресми түрде пайдалануға берілген соң, Ханчжоу – Цюйчжоу жоғары жылдамдықты теміржолы Ханчжоу шығанағы және Цзиньхуа – Цюйчжоу – Лишуй экономикалық белдеулерін байланыстыратын негізгі көлік "артериясына" айналады.