Астанада мектеп түлектері қаланың жоғары оқу орындарында күндізгі оқу ақысын төлеуге әлеуметтік көмек ала алады. Оған кім үміткер бола алатынын елорданың Жұмыспен қамту және әлеуметтік қорғау басқармасы басшысының орынбасары Айгүл Таласова айтып берді. Бұл туралы әкімдіктің ресми сайты жазды. 

"Биылғы 1 шілдеден 21 тамызға дейін (қоса алғанда) Астана қаласының Жұмыспен қамту және әлеуметтік қорғау басқармасы қаланың жоғары оқу орындарында күндізгі оқу ақысын төлеу жөнінде әлеуметтік көмек көрсету үшін құжаттар қабылдап жатыр", – деді Айгүл Таласова.

Оқи отырыңыз: Білім грантының бағасын арттыру жоғары оқу ақысына әсер ете ме? Министр жауабы

Қаланың жоғары оқу орындарында оқу ақысын төлеуге әлеуметтік көмек жан басына шаққандағы орташа табысы төрт ең төменгі күнкөріс деңгейінен (213 240 тг) аспайтын ақшалай төлемдер түрінде ұсынылады. Көмек Астана қаласының жалпы білім беретін мектептерінің мынадай санаттағы түлектеріне беріледі:

- жетім балалар;
- балалар үйінің түлектері;
- бала кезінен мүгедектігі бар адамдар;
- ата-анасының қамқорлығынсыз қалған балалар;
- көпбалалы отбасылардан шыққан балалар (оның ішінде биыл үлкен баласы кәмелетке толған кезде білім беру ұйымдарына күндізгі оқу нысанына түскенге дейін).

Тестілеу кезінде қажет ең төменгі балл жинамаған жалпы білім беретін мектептердің түлектеріне әлеуметтік көмек тағайындалмайтынын атап өту маңызды.

Қаржылық қолдау елорданың еңбек нарығында неғұрлым сұранысқа ие мамандықтар бойынша оқыту үшін ұсынылады.

"Медициналық, педагогикалық және техникалық мамандықтарға басымдық беріледі. Сонымен, оқыту жалпы медицина, әлеуметтік жұмыс, сәулет (BIM-менеджер жобалаушы), электр энергетикасы, дене шынықтыру және спорт, психология, есептеу техникасы және бағдарламалық қамтамасыз ету (бағдарламашы), дизайн, ақпараттық жүйелер, азық-түлік өнімдерінің технологиясы, газ жабдықтарына қызмет көрсету инженері, информатика, тасымалдауды ұйымдастыру, қозғалыс және көлікті пайдалану, биотехнология, бастауыш сынып оқушыларын оқыту педагогикасы мен әдістемесі, мектепке дейінгі оқыту, математика, химия, биология мұғалімі және т.б." – делінген хабарламада. 

Оқи отырыңыз: Медициналық ЖОО студенттерінің шәкіртақысы жыл сайын 20% артады

Әлеуметтік көмек алу үшін өтініш беруші мынадай құжаттар пакетін ұсынуы керек: 

1) жеке басын куәландыратын құжат;
2) жиынтық табысты есептеу қағидаларына сәйкес адамның (отбасы мүшелерінің) табысы туралы мәліметтер;
3) ата-анасының қайтыс болғаны туралы куәліктің көшірмесі (жетім балалар үшін);
4) көпбалалы отбасының мәртебесін растайтын құжаттың көшірмесі (көпбалалы отбасылардан шыққан балалар үшін);
5) туу туралы куәліктің көшірмесі (жетім балалар үшін);
6) Астана қаласының орта мектебін бітіргені туралы аттестат;
7) ұлттық бірыңғай тестілеу нәтижелері бойынша берілген мемлекеттік сертификат.
8) екінші деңгейдегі банктегі не "Қазпошта" акционерлік қоғамындағы банк шотының нөмірі туралы мәліметтер.