Мемлекет басшысы Қасым-Жомарт Тоқаев мәдениет және өнер қызметкерлерін мемлекеттік наградалармен марапаттау туралы жарлыққа қол қойды. Бұл туралы Ақорда хабарлады.

Президент жарлығы бойынша, мәдениет саласындағы ерекше еңбегі мен Қазақстанның рухани дамуына қосқан үлесі үшін бірқатар өнер қайраткерлері жоғары мемлекеттік марапаттарға ие болды.

Ең жоғары наградалардың бірі – "Отан" ордені Татьяна Бурмистроваға табысталды. Ол Алматыдағы "Ұлттық өнер" ЖШС директоры қызметін атқарады.

ІІ дәрежелі "Барыс" орденімен Мақпал Жүнісова марапатталды. Ал ІІІ дәрежелі "Барыс" ордені Марина Ганцеваға берілді.

Биыл бірнеше өнер майталманына "Қазақстанның халық әртісі" құрметті атағы берілді. Олардың қатарында Бахтияр Қожа, Нина Макарова және Азат Сейітметов бар.

Сонымен қатар "Қазақстанның еңбек сіңірген қайраткері" атағы мәдениет пен өнер саласының бірқатар өкіліне табысталды. Олардың ішінде дирижерлер, актерлер, музыканттар мен суретшілер бар.

"Парасат" орденімен Салтанат Әбілханова, Римма Ким және Оңайгүл Тұржан марапатталды.

Ал ІІ дәрежелі "Достық" ордені Түркия Республикасының Әділдік және даму партиясы төрағасының орынбасары Кюршад Зорлуға табысталды.

Сондай-ақ "Құрмет" ордені, "Ерен еңбегі үшін" және "Шапағат" медальдары мәдениет, театр, музыка, журналистика және қоғамдық қызмет саласының өкілдеріне берілді.

Мемлекет басшысы мәдениет пен өнер саласы елдің рухани дамуы мен ұлттық болмысын сақтауда маңызды рөл атқаратынын атап өтті. Жалпы биыл 120 мәдениет және өнер қызметкері мемлекеттік марапатқа ие болады.

Оқи отырыңыз: Тоқаев бірнеше театр мен филармонияға жаңа мәртебе беруді ұсынды