20 шілдеде Қарағанды қаласында орналасқан "YDD Corporation" ЖШС ферроқорытпа зауытындағы адам шығыны орын алған жазатайым оқиғаны тергеу үшін құрылған арнайы комиссия оқиғаның мән-жайын зерделеп, негізгі кінә жұмыс берушіде екенін анықтады.

Еңбек және халықты әлеуметтік қорғау министрлігінің мәліметінше, комиссия мүшелері техникалық құжаттаманы, оқиға болған жерді тексеру нәтижелерін, куәгерлердің сауалнамаларын, сараптама ұйымының қорытындысын, нормативтік құжаттар мен басқа да материалдарды зерделегеннен кейін осындай қорытындыға келді.

"Кәсіпорында травматикалық факторлардың әсерін болдырмау үшін шұғыл шаралар тиісті дәрежеде қабылданбағаны, қауіпсіз еңбек жағдайлары мен қызметкерлердің ережелерді, нұсқаулықтарды және технологиялық тәртіпті сақтауын бақылау элементтері тиісті дәрежеде жасалмағаны анықталды. Комиссия мүшелері зардап шеккендермен және отбасы мүшелерімен кездесті, оларға қолданыстағы заңнамаға сәйкес әлеуметтік қорғауға заңды құқықтары түсіндірілді.Арнайы комиссияның тергеу нәтижелері және жиналған барлық материалдар болған жазатайым оқиғаға кінәлі деп танылған адамдарды жауапқа тарту үшін құқық қорғау органдарына беріледі", – делінген хабарламада.

Оқи отырыңыз: Ферроқорытпа зауытындағы оқиға: зардап шеккен екі адамның жағдайы жақсарды

Сонымен қатар комиссия "YDD Corporation" ЖШС басшылығына жазатайым оқиғаның себептерін жою және алдағы уақытта осындай жағдайлардың алдын алу жөнінде шаралар кешенін қабылдауға қаулы етті.

Жұмыс берушінің ақпараты бойынша, жұмыс берушінің міндеттемелеріне қатысты материалдық сипаттағы барлық мәселе, сонымен қатар қаза болғандар мен зардап шеккендердің жақын туыстарына өзге де көмек көрсету реттелген.

Сонымен қатар жұмыс беруші зардап шеккендердің жақын туыстарына өтеусіз материалдық көмек көрсетті.

Еске салайық, 2024 жылғы 20 шілдеде Қарағанды қаласында "YDD Corporation" ферроқорытпа зауытында өндірісте жазатайым оқиға орын алып, нәтижесінде сегіз жұмысшы зардап шекті, олардың төртеуі қаза болды.