ІІМ есірткі қылмысына қарсы іс-қимыл жөніндегі қызметкерлері Алматының Жетісу ауданында жалға алынған жеке үйлердің бірінде есірткі зертханасын жойды, деп хабарлайды Polisia.kz.

"Жедел іздестіру іс-шараларын жүргізу барысында жалпы салмағы бір жарым килограмнан асатын "aльфа-pvp" синтетикалық психотроптық заты табылып, тәркіленді. Күдікті ұсталды. Одан салмағы 100 грамнан асатын "синтетика" тәркіленді. Ер адам есірткіні байланыссыз тәсілмен өткізбек болған. Ол уақытша ұстау изоляторына қамалды", – деді ІІМ есірткі қылмысына қарсы іс-қимыл комитеті төрағасының орынбасары Қуандық Әлжанов.

Оқи отырыңыз: Есірткі сақтағаны үшін күдікке ілінген азамат Грузиядан экстрадицияланды

Полиция жыл басынан бері 52 есірткі зертханасын жойды. Заңсыз айналымнан жарты тонна "синтетика" тәркіленген, бұл былтырғымен салыстырғанда екі есе көп.

"2021 жылғы қазаннан бастап "синтетика" есірткінің ауыр түріне теңестірілді. Оларды сақтау үшін қылмыстық жауапкершілік бір грамнан басталады. Аталмыш факт бойынша күдікті мүлкі тәркіленіп, 10 жылдан 15 жылға дейін бас бостандығынан айырылуы мүмкін", – деді Қуандық Әлжанов.