2022 жылғы 23-26 қарашада Алматыда республикалық "Шертпе күй" дәстүрлі музыка фестивалі өтеді, деп хабарлады Мәдениет және спорт министрлігінің баспасөз қызметі. Фестивальді Құрманғазы атындағы Қазақ ұлттық халық аспаптар оркестрінің ұйымдастырады.

Шара мақсаты – қатысушылар арасынан дарынды жас өнерпаздарды анықтап, олардың кәсіби шеберлігін арттыру, күй өнері арқылы қазақстандық патриотизм мен ұлттық мәдениетті дамыту.

Дәстүрлі музыка фестиваліне 16-35 жастағы музыкалық аспап (домбыра) орындаушылары қатыса алады. Байқау 2 турдан тұрады, қатысушылар дәстүрлі "шертпе" мектебі өкілдерінің 5 шығармасын және қатысушының таңдауы бойынша қазіргі заманғы композитордың бір күйін орындайды.

Оқи отырыңыз: 75 этнос өкілінен құралған қазақстандық оркестр әлемдік Гиннесс рекордтар кітабына енді

Байқау жеңімпаздары бас жүлде, І, ІІ және ІІІ дәрежелі дипломдармен, сондай-ақ Төлеген Момбеков атындағы арнайы дипломмен марапатталады.

"Домбыра" номинациясында шертпе дәстүріндегі үздік орындаушыларды анықтайтын конкурсқа өтінімдер 2022 жылдың 6 қыркүйек – 18 қараша аралығында қабылданады.