Сауд Арабиясында мұсылмандардың жыл сайынғы Меккеге қажылық сапары кезінде аптап ыстықтан жүздеген адам қайтыс болды, деп хабарлады DW ақпарат агенттігі.  

AFP агенттігінің мәліметінше, қажылық кезінде кем дегенде 550 адам қайтыс болған. Оның ішінде 323-і Мысырдан келген. 

Tunis Afrique Presse ақпарат агенттігінің хабарлауынша, құрбандар арасында Тунистің 35 азаматы бар. 

Иранның ИРНА ақпарат агенттігі 11 ирандықтың қаза болғанын, тағы 24-і ауруханаға жатқызылғанын хабарлады. Бұл адамдардың көпшілігі қатты аптап ыстықтан қайтыс болды.

Оқи отырыңыз: Меккеге қажылық парызын өтеу үшін 2 миллионға жуық адам келді

Сауд Арабиясының денсаулық сақтау министрлігі өте жоғары температура кезінде қажылыққа барушылар арасында ерекше өлім жағдайлары анықталмағанын мәлімдеді. 

17 маусымда Меккедегі Масджид әл-Харам үлкен мешітінде ауа температурасы көлеңкеде 51,8 градусқа жетті. 2 700-ден астам адамға қатты қызып кетуіне байланысты медициналық көмек көрсетілді. 

Сауд Арабиясы статистика департаментінің мәліметінше, қажылыққа 1,8 миллион адам қатысып жатыр.