Жемқорлық дерегі туралы хабарлаған адамға пара сомасының 10 пайызы көлемінде сыйақы беріледі

Сыбайлас жемқорлыққа қарсы іс-қимыл агенттігінің басшысы Алик Шпекбаевтың айтуынша, Үкімет азаматтарды ынталандырудың жаңа жүйесі туралы қаулы қабылдаған. Соның негізінде сыйақы мөлшері Экономикалық ынтымақтастық және даму ұйымы елдерімен бірдей теңестіріледі. Жемқорлық туралы хабарлаған адамға сот үкімі шыққан соң, параның жалпы сомасының 10 пайызы көлемінде сыйақы беріледі.

"Сыбайлас жемқорлық деректері туралы хабарлаған адамдарды қорғаудың кешенді жүйесін қалыптастыру жалғасады. Біз бұл орайда халықаралық стандарттарға жауап беретін ұлттық жүйені құруымыз қажет", – деді агенттік басшысы Алик Шпекбаев.

Білім және денсаулық сақтау саласындағы сыбайлас жемқорлық қылмыстары негізінен жұмысқа орналасу кезінде және қаржылық махинациялармен байланысты. Олардың көпшілігі әкімдіктерге бағынышты ұйымдарда жасалады. Бұл мәселені шешу үшін бюджеттік мекемелердің басшыларын мемлекеттік сатып алуды өткізуден және бухгалтерияны орталықтандырудан толық босату көзделіп отыр.

Оқи отырыңыз: Мемлекеттік қызметкерлер мұқтаждықтың кесірінен пара алады. Алик Шпекбаев мемлекеттік қызметкерлердің жалақысын 2 есе өсіру тәсілін атады

Бұған қоса, еліміздің барлық білім беру мекемелерінде "Адалдық негіздерін" міндетті түрде оқыту ұсынылды.

"2020 жылы Қазақстанда мемлекеттік органдардың "Адалдық негіздері" рейтингі енгізілетін болады. Ол қызметкерлердің ашықтығы, есеп беруі және тұрғындарға қызмет көрсетуінің деңгейі бойынша сараланады. Мемлекеттік органдардың рейтингтегі орны азаматтардың олардың жұмысына шынайы қанағаттанушылығын көрсетеді. Әр ауылдық округте мемлекеттік басқарудың сервистік моделі енгізіледі", – деді Алик Шпекбаев.