Transparency International халықаралық ұйымы жыл сайынғы жемқорлықты қабылдау индексін жариялады. 180 ел қатысқан рейтингте Қазақстан 113-орынға ие болып, Сальвадор, Непал, Филиппин, Замбия, Свазилэнд елдерімен бір сатыға орналасты. Индексте Жаңа Зеландия мен Дания көш бастаса, Сомали, Оңтүстік Судан, Сирия мемлекеттері соңғы орындарды иеленген.

Жаһандық зерттеуде саяси ашықтық, саясат пен ақша, жемқорлық арасындағы байланыс, саяси билік пен партиялар, сайлау науқандарын қаржыландыру ережелеріне ықпал ету мәселелеріне назар аударылған.

"2008 жылы Қазақстан БҰҰ-ның сыбайлас жемқорлыққа қарсы конвенциясына қосылғанымен, 2015 жылы ғана оның талаптарын өз заңнамасына енгізді. Алайда Қазақстандағы сыбайлас жемқорлық түсінігі халықаралық құқық талаптарына сай келмейді", – деді Transparency Kazakhstan ұйымының атқарушы директоры Ольга Шиян.

Оның айтуынша, Қазақстанның рейтингтегі көрсеткішін әлі де жақсартуға сотталған жемқорлардың босап шығу деректері кедергі.

"Қазақстанда 2018 жылы жемқорлық қылмысын жасаған адам залалды толық өтеп, айыппұл төлеген жағдайда мерзімінен бұрын босауына заңнамалық негізде мүмкіндік берілді. Халықаралық құқықта бұған жол берілмейді", – деді Ольга Шиян.

Transparency International Қазақсанға сайлауда әділдікті арттыруды, саяси науқан кезінде жалған мәлімет таратуға шектеу қоюды және азаматтардың құқықтары мен мүмкіндіктерін кеңейтуді, белсенділер мен журналистердің қорғалуын қамтамасыз етуді ұсынды.

Читайте Informburo.kz там, где удобно:

Facebook | Instagram | Telegram

Если вы нашли ошибку в тексте, выделите ее мышью и нажмите Ctrl+Enter