Еңбек министрі: Бала күтіміне жәрдемақы төлеу уақытын ұзартуды жоспарлап отырмыз

Қазақстанда 387 мың ана бала күтіміне төленетін жәрдемақы алады.

Еңбек және халықты әлеуметтік қорғау министрі Біржан Нұрымбетовтың айтуынша, жұмыс істемейтін аналарға жыл бойы 15 мың теңге мен 24 мың теңге аралығында төленеді. Ал жұмыс істейтіндер жалақысының 40 пайызын әлеуметтік сақтандыру қорынан бір жыл бойы алып отырады.

"Біз бала бір жасқа толғанға дейін ай сайын берілетін жәрдемақыны ұлғайту мәселесін көтергіміз келеді. Министрлікте жәрдемақыны бір жарым немесе үш жасқа дейін төлеу қарастырылуда", – деді Біржан Нұрымбетов.

Оқи отырыңыз: Зейнетақы, жәрдемақы және шәкіртақы өсті. Әлеуметтік төлемдер қалай өзгерді?

Сондай-ақ, министр мүгедек бала күтіміне берілетін жәрдемақы туралы ұсыныстарды да сөз етті:

"Қазір мүгедек бала күтімі үшін оның ата-анасы не қамқоршыларына, сондай-ақ, туғалы I топ мүгедегі боп танылған жандарға жәрдемақы беріліп жүр. Алайда, арамызда бала кезінен емес, жүре келе I топ мүгедегі боп танылған азаматтар бар. Оларға да күтім қажет. Сондықтан, осындай жандарға қосымша жәрдемақы тағайындалса, дұрыс болар еді".

Бұлар әзірге тек жоспар күйіндегі ұсыныстар. Министр олардың үкіметтің немесе атқарушы органдардың бекітуіне әлі енгізілмегенін айтты.