2025 жылы ірі кинопремьералар жоспарланған. DC жаңа киноәлемді "Суперменмен" бастаса, Marvel бір жылда бірнеше фильм шығармақ. Ал "Формула-1" аталған жарыс туралы тарихтағы ең қымбат фильм болмақ. Дисней студиясының "Ақшақар" фильмі қазақшаға дубляждалады.
Биыл бұдан өзге тағы қандай фильмдер жарыққа шығады? Информбюро порталы әлемдік кинопремьераларға шолу жасады.
"Аватар: От пен күл"
Ең көп касса жинаған "Аватар" фильмінің үшінші бөлімі 2025 жылғы 19 желтоқсанда көрерменге жол тартады деп жоспарланып отыр. Режиссер Джеймс Кэмеронның әйгілі туындысының екінші бөлімі "Су жолы" деп аталса, бұл жолғы атауы – "От пен күл" (Fire and Ash). Бұл бөлімде Пандора әлемі тереңірек зерттеліп, жаңа тайпалар қосылады. Оған қоса экология, отбасы және қақтығыс мәселесі кеңінен ашылады.
Фильм сюжеті құпия сақталғанымен, оқиға Пандораның отқа негізделген тайпаларын зерттеп, "Күл халқының" (Ash People) тарихын баяндайды. Бұл жолы Пандора тұрғындарының қараңғы, қарама-қарсы жағы көрсетіледі.
"Капитан Америка: Батыл жаңа әлем"
Marvel киноәлеміндегі "Капитан Америка" фильмінің жалғасы – "Батыл жаңа әлем" 2025 жылғы 14 ақпанда экранға шығады. Бұған дейін Стив Роджерс Капитан Америка болған еді. "Кек алушылардың" соңғы бөлімінде қалқаны мен атағын ол "Сұңқарға", яғни Сэм Уилсонға қалдырды. Marvel сюжетті құпия ұстағанымен фильмде Сэм Уилсонның жаңа Капитан Америка ретінде қаһарманға айналу жолын баяндалады.
Бұл – Marvel кинеәлеміндегі төртінші "Капитан Америка" фильмі және Сэм Уилсонды осы рөлде көрсететін алғашқы фильм. Фильм режиссері: Джулиус Она.
"Таңғажайып төрттік"
2025 жылғы 25 шілдеде Marvel суперқаһармандары – "Таңғажайып төрттік" фильмі шығады. Бұл жолы фильм "Таңғажайып төрттік: Алғашқы қадамдар" деп аталады. Режиссері: Мэтт Шакман.
Таңғажайып төрттік – Marvel Comics компаниясының ең алғашқы фантастикалық кейіпкерлер тобы. Төрт студент университетте оқып жүргенде нормадан ауытқыған ғарыштық энергия толқынын зерттегісі келіп, рұқсат сұрайды. Рұқсат ала алмаған достар амалсыздан айлақтағы соңғы зымыранды айдап әкетіп, ғарышқа ұшып кетеді. Жерге оралған соң кейіпкерлер ғажап қабілеттерге ие болады: Рид – денесін резеңке секілді созу, Сью – көзге көрінбеу, Джонни – жалынды адамға айналып, ұшу және отты қолдану, ал Бен тас адам атанып, адам сенгісіз ұлы күш пен қуатқа ие болды. Сөйтіп олар зұлымдыққа қарсы күресіп, суперқаһармандарға айналады.
Фильм сюжеті құпия болса да, Marvel киноәлемінің маңызды бөлігі саналатын әйгілі суперқаһармандар – Рид Ричардс (Мистер Фантастик), Сью Шторм (Көрінбейтін әйел), Джонни Шторм (Алау адам) және Бен Гриммнің (Тас адам) оқиғасын жандандырады.
"Супермен"
"Супермен" – DC Comics комикстерінің суперқаһарман кейіпкері Супермен туралы фильм. Бұл DC Universe медиафраншизасындағы алғашқы фильм, енді Супермен туралы фильмдер жаңадан шығады. Фильмнің режиссері және сценаристі – Джеймс Ганн. Супермен рөліндегі Кларк Кентті актер Дэвид Коренсвет сомдайды. Фильм сюжетінде Супермен бөтен ғаламшарлық тегі мен қарапайым адам арасындағы тепе-теңдікті табуға тырысады. Фильм премьерасы 2025 жылғы 11 шілдеге жоспарланған.
"Ақшақар"
Биыл Disney студиясының тағы бір фильмі қазақ тілінде жарық көреді. Бұл жолы көрермендер "Ақшақар" фильмін қазақ тілінде тамашалай алады. "Ақшақар" – 1937 жылғы анимациялық фильмнің жаңа нұсқасы. Ақылды, Жұбаншақ, Күлегеш, Ұялшақ, Түшкiршек, Ұйқышыл және Аңқау есімді көрерменге таныс 7 ергежейлі экранға оралады. Ғажайып оқиға мен әсем әуенге толы бұл туынды балаларды да, ересектерді де бейжай қалдырмай, сиқыр әлеміне жетелейді.
"Ақшақар" фильмінің режиссері – Марк Уэбб. Фильм 2025 жылғы 21 наурызда қазақ тілінде жарыққа шығады деп жоспарланып отыр.
"28 жылдан соң"
"28 жылдан соң" – режиссер Дэнни Бойлдің "28 күннен соң" (2002) және "28 аптадан соң" (2007) атты хоррор фильмдерінің жалғасы. Премьерасы 2025 жылғы 20 маусымда жоспарланған.
Бұл фильмдер ақырзаманнан кейінгі зомбилер бар өмірді баяндайды. "28 күннен соң" фильміне түскен Киллиан Мерфиді фильмнің жалғасынан көре аламыз. Фильм сюжеті Ұлыбританияда өрбиді. Індет жайлағанына жеті ай өткен соң ауру жұқтырғандардың көбі аштықтан өледі. Фильм трейлерінен арада 28 жыл өтсе де індеттің аяқталмағанын көреміз.
Актер Рэйф Файнс фильм өлуге жақын қалған анасын құтқаратын дәрігерді іздеген кішкентай баланың оқиғасы туралы дейді. Ол Англияның солтүстігін бойлай анасын алып жүреді. Орманда ауру жұқтырғандар тығылған. Бала дәрігерді тапқанда ол алғашында біртүрлі адамдай көрінуі мүмкін, бірақ шындығында ол жақсылық жағында болады.
Фильм iPhone 15 Pro Max смартфонына түсірілген.
"Орындалмайтын миссия"
2025 жылғы 21 мамырда атақты Том Круз ойнайтын "Орындалмайтын миссия" фильмінің сегізінші бөлімі шығады. Фильм режиссері – Кристофер Маккуорри.
Том Круз "Орындалмайтын миссия" фильмі жарық көргелі 29 жыл бойы арнайы агент Этан Хант рөлін ойнап келеді. Бұл жолы ол күллі әлемге қауіп төндіретін инновациялық жасанды интеллекті табуға тырысады. Ол оның көзін жойып, ата жауы Рабриэлдің жолын кесуі керек. Бұл бөлімде де алдыңғы бөлімдердегі көптеген таныс кейпкер бар.
Айдаһарды қалай қолға үйрету керек
"Айдаһарды қалай қолға үйрету керек" анимациялық трилогиясының режиссері, сценарисі әрі продюсері Дин ДеБлуа бұл жолы кәдімгі актерлер сомдайтын фильм түсірді.
Фильм сюжеті бойынша бір кездері Викингтер айдаһармен үйлесімді өмір сүрді. Алайда заман өзгеріп, олар қаншама жыл айдаһарлармен соғысты. Жеткіншек Иккинг бір күні "Тіссіз" атты айдаһармен жолығып, екеуі достасып кетеді. Айдаһар оған және өзге де викингтерге әлемді басқа қырынан тануға көмектеседі.
Крессида Коуэллдің бестселлер кітаптарынан шабыттанған DreamWorks Animation студиясының "Айдаһарды қалай қолға үйрету керек" туындысы бірнеше марапатқа ие болды. Әлемдік прокатта 1,6 миллиард АҚШ долларынан астам табыс жинады. Бұл жолы Дин ДеБлуа озық визуалды эффектілер қолданып, анимациялық туындыны жанды әсерлі көрініске айналдырып, достықтың, батылдық пен тағдырдың шынайы мәнін ашқанда, Хикуп пен Тіссіздің эпикалық шытырман оқиғаларын таң қалдыратын реализммен өмірге әкеледі. .
Фильм 2025 жылғы 13 маусымда жарық көреді деп жоспарланған.
"Микки 17"
Оскар алған "Паразиттер" фильмінің режиссері оңтүстік кореялық Пон Джун-хо "Микки 7" фантастикалық романының желісімен "Микки 17" фильмін түсірді. Танымал актер Роберт Паттинсон мұз планетасын отарлау экспедициясының "бір реттік" қызметкері Миккиді сомдайды. Микки қайтыс болған сайын оның санасы жаңа денеге, яғни оның көшірмесіне жүктеледі. Алтыншы рет өлген соң Микки басқа қызметкерлерге ұқсамайтынын түсінеді. Жетінші миссияда тірі қалып, базадан байланыс үзіп қалады. Базаға оралғанда өзін алмастыратын адамды жасап қойғанын көреді.
Фильмде Тони Коллет, Стивен Йен және Марк Руффало ойнайды. "Микки 17" премьерасы бірнеше рет кейінге қалдырылды. Биыл 7 наурызда экранға шығады деп жоспарланып отыр.
"Формула-1"
"Формула-1" чемпионаты туралы Apple Studios фильмі 2025 жылы маусымда жарық көреді. Басты рөлді Брэд Питт сомдайды. Фильм режиссері – Джозеф Косински. "Мерседес" командасының шабандозы, жеті дүркін әлем чемпионы Льюис Хэмилтон продюсерлік етті.
Фильм сюжеті бойынша "Формула-1" жұлдызы Сонни Хейс 1990-жылдары ауыр апаттан кейін спорттан кетеді. Бірнеше жылдан соң APXGP командасы екінші пилот ретінде топқа қосылуды және вундеркинд Джошуа Пирске тәлімгер болуды ұсынады.
Картина "Формула-1" кезеңдерінің бірінде түсірілді.
