Жылжымайтын мүлік және бірыңғай кадастр бойынша қызмет көрсету уақытша тоқтатылды

Қазақстанда жылжымайтын мүлік және жер кадастры бойынша қызметтерді онлайн алу 19 маусымнан бастап уақытша тоқтатылады. Бұл туралы "Азаматтарға арналған үкімет" корпорациясының баспасөз қызметі хабарлады.

Қызметтің тоқтауы іске қосу-реттеу жұмыстарының жүргізілуіне байланысты болып отыр.

"Мемлекеттік корпорация, 19 маусымда жылжымайтын мүліктің бірыңғай мемлекеттік кадастры ақпараттық жүйесіне деректерді көшіруге байланысты жер және жылжымайтын мүлік саласындағы мемлекеттік қызметтердің барлық түрлері уақытша тоқтатылатынын хабарлайды. Бірнеше күн бойы сервистің дұрыс жұмыс істемеуі байқалуы мүмкін",  – делінген хабарламада.

Яғни, құжаттарды қабылдау, ХҚКО-лар арқылы оның ішінде тұрғылықты жері бойынша тіркелу және жылжымайтын мүлікті ресімдеу, сондай-ақ, eGov.kz порталы арқылы тіркелу, нотариустар, салық ұйымдары, ЕДБ және әділет министрлігінің атқарушылық іс жүргізу органдарының жүйелері арқылы қызмет көрсету уақытша тоқтатылады.