Жұмыстың орындалмауын ақша мен ауа райымен байланыстырған Ұлытау әкімі сынға қалды

Үкімет басшысы Берік Әбдіғалиұлына ескерту жасап, жұмысты уақытылы орындауды тапсырды.

Ұлытау облысына бөлінген қаражаттың біраз бөлігі игерілмей, көп жоба аяқталмаған. Үкімет отырысында облыс әкімінің есебін тыңдаған премьер-министр Әлихан Смайылов өңір басшысы Берік Әбдіғалиұлына осыған орай ескерту жасады. 

Берік Әбдіғалиұлы қаражаттың уақытылын игерілмеуін ауа райымен және қаржының кеш түсуімен түсіндірді.

"Ауыл – ел бесігі" жобасы аясында бюджетті нақтылау барысында 2022 жылғы мамыр айында Ұлттық қордан 4 ауылдық елді мекенде 5 жобаны жүзеге асыруға 634 млн теңге бөлінді. Оның ішінде 4 фельдшерлік-акушерлік пунк құрылысына 480 млн теңге және Жаңаарқа ауданында дене шынықтыру-сауықтыру құрылысына 154 млн теңге қаралған. Құрылыс-монтаждау жұмысының конкурстық рәсімдерін Қарағанды облысының құрылыс басқармасы 2022 жылдың 14 маусым – 14 тамыз айларында ғана өткізіп, келісімшарттар Ұлытау облысына 15 қазанда берілді. Жыл қорытындысы бойынша 350 млн теңге немесе 56 пайызы игерілді. Қаражаттың игерілмеуі жалпы ауа райы жағдайына және Қарағанды облысынан шарттар бойынша міндеттемелердің кеш берілуіне байланысты болды", – деп ақталды облыс басшысы.


Оқи отырыңыз: Ұлытау тұрғындарының жалақысын 20 пайыз көбейту ұсынылды


Алайда, үкімет басшысы Әлихан Смайылов әкімнің бұл жауабына қанағаттанған жоқ.

"Ақша бөлінеді. Енді сіздердің жұмыстарыңыз – соларды тиімді пайдаланып, іске асыру. Сондықтан сіздің айтқан "Ақша уақытылы бөлінбеді" деген себепті біз қабылдамаймыз. Жұмысты уақытылы орындаңыз", – деді Әлихан Смайылов.

Жаңалықты жарнамасыз оқыңыз. iOS және Android жүйесіне арналған informburo.kz мобильді қосымшасын жүктеңіз.

Тарату:

  Егер мәтінде қате болса, оны белгілеп, Ctrl+Enter батырмасын басыңыз

  Егер мәтіндегі қатені смартфонда көрсеңіз, оны белгілеп, «Қатені хабарлау» батырмасын басыңыз

Біздің Telegram-каналдағы ең көп оқылған жаңалықтар

Серіктестер жаңалықтары