WPC фиджитал спортты басқаруда блокчейн технологиясын енгізді

Фиджитал спорттың халықаралық басқарушы ұйымы – World Phygital Community (WPC) фиджитал спорт саласын реттеуге арналған және блокчейнге негізделген басқару және деректер жүйесін іске қосқанын мәлімдеді. 

Жаһандық деңгейде спортты басқару мен реттеуді жаңғыртуға бағытталған жоба WPC-нің ашық, қоғамдастыққа негізделген және заман талабына сай басқару моделін қалыптастыру жөніндегі көзқарасын көрсетеді. Басқару тетіктерін тікелей цифрлық инфрақұрылымға енгізу арқылы ұйым спорт саласындағы реттеуші инновациялардың алдыңғы шебінен көрінуде.

Физикалық және цифрлық элементтерді біріктіретін жарыс форматтарына арнайы әзірленген бұл жүйе шешімдердің тексерілуін, деректердің қауіпсіздігін және WPC-ге мүше федерациялардың тең дәрежеде қатысуын қамтамасыз етеді.

Блокчейн жүйесі 2025 жылғы "Болашақ ойындары" аясында, 17 желтоқсанда Абу-Дабиде өткен WPC Бас ассамблеясында сынақтан өтті. Жүйе мүше федерацияларға тең дауыс беру құқығын ұсынып, мүшелік деректердің өзгермейтін тіркелуін және қабылданған шешімдердің бұрмалауға жол бермейтін құжатталуын қамтамасыз етті. Бұл тәжірибе федерациялық басқару құрылымында орталықсыздандырылған басқару құралдарының ресми шешім қабылдау үдерісінде алғаш рет қолданылуының бірі болды.

Аталған бастама WPC-нің толық орталықсыздандырылған басқару жүйесіне көшу жол картасының алғашқы кезеңі саналады. Ұзақ мерзімді перспективада ұйым Decentralized Autonomous Organization (DAO) үлгісіне өтуді көздеп отыр. Алдағы уақытта блокчейн басқару жүйесі стратегиялық шешімдерге, қаржылық операцияларға және фиджитал қозғалыс аясындағы реттеуші үдерістерге енгізіледі. Сонымен қатар, беделге негізделген ынталандыру тетіктері мен толықтай блокчейнде жұмыс істейтін қазына жүйесін іске қосу жоспарланған.

Бұдан бөлек, WPC блокчейнді жарыс нәтижелерінің ашықтығы мен сенімділігін қамтамасыз етуге де пайдаланбақ. Ұйым фиджитал жарыстардың нәтижелерін, рейтингтер мен спортшылардың көрсеткіштерін тұрақты әрі тексерілетін форматта тіркейтін жүйе әзірлеуде. Бұл цифрлық бәсекелестік маңызды рөл атқаратын ортада ұзақ мерзімді сенім қалыптастырудың негізгі тетігі ретінде қарастырылуда.

"Блокчейнге негізделген басқару моделін енгізу – қауымдастығымыз үшін үлкен қадам. Бұл технологияны қозғалыстың бастапқы кезеңінде енгізу арқылы біз ауқым кеңейгенге дейін ашықтықты, есептілікті және мағыналы қатысуды қамтамасыз ететін стандарттарды қалыптастыра аламыз", – деді World Phygital Community ұйымының төрағасы Дэн Меркли.

Қазіргі таңда World Phygital Community құрамында 115 елден 119 мүше федерация бар. Фиджитал спорт экожүйесінде қатысушылар саны мен халықаралық үйлестіру қарқынды өсіп келе жатқан жағдайда, жаңа цифрлық басқару жүйесі ұйымның реттеуші инфрақұрылымын сенімді түрде кеңейтуге және фиджитал қозғалыстың ұзақ мерзімді дамуына берік негіз қалыптастыруға бағытталған.