Үсік жүріп, бұршақ жауады. 14 сәуірге арналған ауа райы болжамы қандай

"Қазгидромет" РМК 14 сәуірде елімізде болуы ықтимал қауіпті метеорологиялық құбылыстарға қатысты болжамын жариялады.

Мекеме мәліметінше, атмосфералық фронтальды бөліктер Қазақстанның басым бөлігіне ықпалын сақтап, найзағай ойнап, жаңбыр жауады.

"Оңтүстік-шығыста, түнде орталықта – қатты жаңбыр, ал солтүстікте – жаңбыр мен қар аралас қатты жауын-шашын күтіледі. Тек республиканың оңтүстік-батысында ғана жауын-шашынсыз ауа райы болжанып отыр", – делінген хабарламада.

Бұған қоса, еліміз бойынша желдің күшеюі мен тұман күтіледі. Оңтүстік-шығыста, шығыста, солтүстікте және орталықта бұршақ жаууы мүмкін. Оңтүстік-шығыста дауыл соғады деп болжануда.

Күндіз Жетісу облысының Алакөл ауданында желдің екпіні 30 м/с -тан асады.

Ал түнде Ақмола, Қостанай, Солтүстік Қазақстан облыстарының батысында және Ақтөбе облысының солтүстігінде 3 градусқа дейін үсік жүруі ықтимал.