Тікелей эфир

"Ұн мен май таратты": Мемлекеттік мектеп оқушыларын жеке білім ошағына ауысуға үгіттеген кім?

Ата-аналар жекеменшік мектеп ашылғалы бері тынышы қашқанына налып отыр.

Түркістан облысының Ақсу ауылындағы ата-аналар балаларын жаңадан ашылған жекеменшік мектепте оқытуға қарсы. Айтуларынша, білім ұясының ұжымы оларды баласын мемлекеттік мектептен жекеменшік мектепке ауыстыруға барынша үгіттеп жатыр. Ол үшін азық-түлік таратып, қызықтыруға көшкен, деп хабарлады 31 арнаның "Информбюро" ақпараттық бағдарламасы.

Ата-аналар жекеменшік мектеп ашылғалы бері тынышы қашқанына налып отыр. Айтуларынша, екі күннің бірінде сол ұжымның қызметкерлері үйге келіп, үгіт жүргізіп, мазасын алған.

"Қазірбасқа мектепке өткізесіңдер деп үгіт жүргізіп жатыр. Бір қап ұн, бір құты маймен баланың өмірін сатып ала ала ма? Сатып ала алмайды", – дейді ата-аналардың бірі Гүлмира Юлдашқызы.  

Ата-аналар әзірге тегін оқып жүрген балаларын бірер жылда ақылы білім алуға мәжбүрлей ме деп те үрейленеді. Мұғалімдер де жекеменшік мектепке ауысуға қорқып отыр. Айтуларынша, ол жақта еңбекақыға ауыл квотасы қосылмайды деген сыбыс естіген.  


Оқи отырыңыз:


Ал тиісті басқарма басшылығының сөзіне сүйенсек, мемлекеттік мектепте жағдай қарастырылмаған: спорт зал, асхана жоқ, сыныптар тар. "Нысанда техникалық кемшіліктер бар" деген ол жеке мектепке ауысатын оқушыларға ешқандай қиындық туындамайтынын айтып отыр. 

"Мысалы 3 "б" сыныбы ауысса, сол жаққа сыныбымен, мұғалімімен барады. Ол жерде қандай психологиялық өзгеріс бар. Тек қана тар, кішкентай мектептен, кең үлкен, зәулім мектепке барады", – дейді Түркістан облысы адами әлеуетті дамыту басқармасы басшысының орынбасары Ардақ Садықова. 

Арна тілшісі жекеменшік мектептің өкілінен үгіт-насихат үшін ұн мен май таратқаны туралы әңгіменің рас-өтірігін сұраған. 

"Ондай нәрсе жоқ. Біз мұндаймен айналыспаймыз", – деді мектеп өкілі.

Сонымен қатар жаңа ұжым өкілдері әр балаға білім бергені үшін жеке мектепке мемлекеттен қаржы қаралатынын, сондықтан оқу процесі тегін болатынын айтады.

Біздің Telegram-каналдағы ең көп оқылған жаңалықтар
Серіктестер жаңалықтары