Үкімет оқушыларды қосымша біліммен 100 пайыз қамтуды жоспарлап отыр

Оқу-ағарту министрлігінің мәліметінше, бүгінде елімізде балаларға арналған 218 сауықтыру орталығы жұмыс істейді, олардың 120-сы – мемлекеттік, 98-і – жеке меншік. 2027 жылға дейін барлық облыста заманауи оқу-сауықтыру орталықтары ашылады. Бұл туралы Үкіметтің баспасөз қызметі хабарлады. 

Оқу-сауықтыру орталықтарының ашылуы балаларды қамту көрсеткішін айтарлықтай ұлғайтады. Жазғы орталықтардағы көрсеткіш жыл сайын 25%-ға өседі деген жоспар бар (2022 жылы аталған орталықтарда 178 мың бала демалды). Ал жыл бойы жұмыс жасайтын орталықтардағы қамту көрсеткіші 2 есе өседі. 

Үкімет баспасөз қызметінің мәліметінше, балалар қосымша біліммен 100% қамтылады. Бұл көрсеткішке ірі қосымша білім беру нысандарын салу арқылы ғана емес, осы мақсаттарға мемлекеттік тапсырысты кезең-кезеңмен ұлғайту арқылы қол жеткізілмек. Сонымен қатар ауыл мектептерінде комьюнити-орталықтар ашу және ескі мектептен тыс ұйымдарды жаңғырту жоспарланып отыр.

---

Оқи отырыңыз: Қаржы министрлігі "Ұлттық қор – балаларға" жобасын қалай жүзеге асыратынын таныстырды

---

"Орталық және жергілікті атқарушы органдардың қатысуымен өткен кеңестің қорытындысы бойынша осы мақсатта Жол картасын бекітіп, жер учаскелерін бөлу шараларын қабылдау туралы тапсырма берілді. Сондай-ақ қысқа мерзімде балалар сауықтыру орталықтары мен ірі қосымша білім беру объектілерін салу, ескі объектілерді реконструкциялау немесе қайта форматтау үшін жобалау-сметалық құжаттаманы әзірлеу міндеттелді" делінген Үкіметтің ресми хабарламасында.