Үйінде есірткі мен Макаров тапаншасын жасырған алматылық ұсталды

Үйінде мефедрон мен Макаров тапаншасын жасырған Алматы тұрғыны ұсталды, деп хабарлайды Polisia.kz сайты.

Күдіктіні қолға түсіру шарасын есірткі қылмысына қарсы күрес басқармасының қызметкерлері полицияның арнайы жасақтарының көмегімен жүргізді.

"Жедел-іздестіру іс-шараларын жүргізу барысында 26 жастағы Г. есімді азамат ұсталды. Тінту кезінде одан ақ түсті ұнтақ заты бар екі полиэтилен бума және төрт патроны бар Макаров тапаншасы табылды және тәркіленді. Сараптама қорытындысына сәйкес, бұл зат – "мефедрон" синтетикалық есірткісі. Мамандардың айтуынша, тәркіленген тапанша – ұңғысын ауыстыру арқылы оқ атуға арналған атыс қаруы. Қару атуға жарамды, – деді Алматы қалалық ПД есірткі қылмысына қарсы күрес басқармасының бастығы Ерлан Әлмағамбетов.

Аталған дерек бойынша қылмыстық іс ҚР ҚК-нің 297-бабы 1-бөліміне сәйкес тергеліп жатыр. Күдікті уақытша ұстау изоляторына қамалды.

Еске салсақ, Ақмола облысында қызметтік иттің екі ұрлықты ашуға көмектескені туралы хабарлаған едік. Екі қылмыс бойынша да сотқа дейінгі тергеу жүргізіліп жатыр.