Түркістан облысында бес баланың әкесі пышақталып қаза тапты. Марқұмның жақындары оқиғаға бірнеше адамның қатысы болғанын айтып, күдіктілердің барлығы жауапқа тартылмағанына алаңдаушылық білдірді, деп хабарлады 31 арнаның Информбюро ақпараттық бағдарламасы.
Марқұмның жұбайы Индира Көлбайдың айтуынша, оқиға болатын түні күйеуі досымен бірге үйден шығып кеткен. Арада шамамен бір жарым сағат өткен соң оның жараланғаны туралы хабар жеткен.
Жұбайының сөзінше, ауруханаға барған кезде марқұмның денесінде көптеген жарақат болған. Ол күйеуінің пышақ жарақатын алғанын және ауыр халде болғанын айтты.
Марқұмның анасы Пакизат Алтынбекова да ұлына бірнеше адамның шабуыл жасағанын айтып, оқиғаға қатысты барлық күдіктінің жауапқа тартылуын талап етті. Оның айтуынша, ұлының артында бес баласы қалған.
Жақындарының мәліметінше, 32 жастағы азамат вахталық әдіспен жұмыс істеген және оқиғадан кейінгі күні жұмысқа жолға шығуға тиіс болған. Марқұмның отбасы қолдарында дәлелдер болғанына қарамастан, іске қатысы бар деп санайтын барлық адамның қамауға алынбағанын мәлімдеді.
Материалда айтылғандай, қанды оқиға Түркістан облысы Түлкібас ауданындағы Шұқырбұлақ ауылында болған.
Оқиғаға қатысты Түркістан облысы полиция департаментіне сұрау жолданған. Алайда материал жарияланған сәтте ресми жауап берілмеген.