Қырғызстан астанасы – Бішкекте өткен Түркі мемлекеттері ұйымының он бірінші саммитінде ТМҰ жаңа туы қабылданды.
Жаңа туда Ұйымның бұрынғы туынан екі өзгешелік бар.
- Біріншісі – тудағы күннің ирек сәулелері түзу сызық болып өзгерді. Бұл 2023 жылдың соңында Қырғызстанның туының өзгеруімен байланысты.
- Екіншісі – туға сегіз бұрышты жұлдыз бейнесі қосылған. Ол – көп ғасырлық түркі мемлекеттігінің белгісі.
"Бүгін Саммитте Түркі мемлекеттері ұйымының туының жаңартылған нұсқасы қабылданды. Оның ерекшелігі – сегіз бұрышты жұлдыз қосылғанында. Қазақ хандығында, Әмір Темір заманында, Салжұқ мемлекетінде, Қарахан кезеңінде және көк түріктер тұсында кеңінен қолданылған сегіз бұрыш – төрткіл дүниеге төрелік еткен түріктің тұтастығын һәм рухани шексіздігін білдіреді. Алғаш туды қабылдағанда оған тікелей қатысымыз болған еді, мағынасы толыса түскен жаңа нұсқаны да қуана қабылдадық", – деп жазды бұл туралы сенат депутаты Дархан Қыдырәлі.
Еске салайық, Түркі мемлекеттері ұйымының 2025 жылғы саммиті Венгрияда өтеді.
Оқи отырыңыз: Түркі мемлекеттері ұйымының 2025 жылғы саммиті Венгрияда өтеді
