"TURGYNDAR AMANATY": Атырауда тұрғын үй саласын жаңғыртудың нақты қадамдары айқындалды

Іс-шара тұрғын үй-коммуналдық шаруашылық саласындағы өзекті мәселелерді талқылайтын маңызды диалог алаңына айналды.

Форумға Атырау облысының әкімі Серік Шәпкенов, "AMANAT" партиясының хатшысы Ержан Жылқыбаев, ҚР Парламенті Мәжілісінің депутаты Дүйсенбай Тұрғанов және сала өкілдері қатысты.

Ержан Жылқыбаев жобаның көпқабатты үйлерді басқаруды жетілдіруге және тұрғындардың қатысуын арттыруға бағытталған тиімді тетік екенін атап өтті. Оның айтуынша, басты міндет – мәселелерді жүйелі түрде шешу. Осыған байланысты МИБ және ПИК төрағаларын оқыту, кері байланысты күшейту, "Халық қатысатын бюджет" бағдарламасын енгізу және белсенді азаматтардан кадрлық резерв қалыптастыру жоспарланған.

Дүйсенбай Тұрғанов тұрғын үй саласындағы реформалар меншік иелерінің рөлін күшейтіп, басқару ашықтығын арттыруға бағытталғанын айтты. Енді тұрғындар басқару нысанын өздері таңдап, тарифтерді бекітіп, қаржының жұмсалуын бақылай алады.

Облыс әкімінің орынбасары Қайрат Нұртаев өңірде су жүйесін цифрландыру, апатты үйлерді көшіру және электр желілерін жаңғырту жұмыстары жүргізіліп жатқанын жеткізді. 801 үйге су есептегіш орнатылып, су тұтыну 7%-ға азайды, 624 пәтер жаңа баспанаға көшірілді.

Форум қорытындысында Серік Шәпкенов тұрғындар мен басқарушы ұйымдар арасындағы байланысты күшейту үшін фронт-офис құруды ұсынды. Нәтижесінде саланы дамытуға бағытталған нақты ұсыныстар қабылданып, белсенді азаматтар марапатталды.