Шоумен Тұрсынбек Қабатов қызын ҰБТ сынағын тапсыруға дайындаған 140+1 мектебіне сынақ тапсырудан шеттетілген өзге үш талапкердің ата-анасымен кездесу мақсатында келді. Бұл жерде ол орталықтың директоры Бауыржан Жәдігеров пен қызын емтиханға дайындаған мұғалім Нұрбек Қанаймен тілдесті.
"Қызымның осы 140+1 мектебінде оқитынын білемін. Сол жерден ҰБТ-ға кеткенін де білемін. Қызым ҰБТ тапсыруға кірді. Қызым ҰБТ тапсырды. Бірақ, ішінде болып жатқан былықты жасаған кім екенін мен білмеймін! Жалған құжатты жасаған Нұрбек пе, басқа ма – ол жағын білмеймін", – деді Тұрсынбек Қабатов.
Ол бұл оқиға туралы тек адвокат Абзал Құспанның әлеуметтік желідегі жазбасынан кейін хабардар болғанын жеткізді. Ал қылмыстық іс бұдан бір ай бұрын, 13 маусымда тіркелген.
140+1 мектебінің мұғалімі Нұрбек Қанай бұл оқиғаны 4 талапкердің де ата-анасы білмейтінін айтып, бар кінәні өз мойнына алып отыр. Оның түсіндіруінше, әр талапкер емтиханға өз құжатымен кірген. Тек логин және пароль берілгеннен кейін орындарын ауысып отырған. Осы жерде күдік тумас үшін ғана жалған құжаттар әзірленген.
Материалдың толық нұсқасын төмендегі видеодан көріңіз:
