Саран қаласының жылусыз қалғаны үшін Тоқаев Қарағанды облысының әкімі Ермағанбет Бөлекбаевқа сөгіс берді. Бұл туралы мемлекет басшысының баспасөз хатшысы Берік Уәли хабарлады.
"Мемлекет басшысы Қасым-Жомарт Тоқаев жылыту маусымына дайындық жұмыстарына тиісінше бақылау жасамағаны үшін Қарағанды облысының әкімі Ермағанбет Бөлекбаевқа сөгіс берді", – деп жазды Берік Уәли әлеуметтік желідегі парақшасында.
Еске салайық, 13 қазанда сыртқы ауа температурасына 0-ден төмен болғанына қарамастан, Саран қаласы жылу желісіне қосылмаған болатын. 15 қазанда үкімет басшысы Саран қаласын жылу беру маусымына дайындамаған шенеуніктерді жауапқа тартуды тапсырды. Қалаға жылу тек 17 қазан күні берілді.
Ал 28 қазанда Саран қаласының әкімі Еркін Баулықов пен Қарағанды облысы энергетика және ТКШ басқармасының басшысы Тілектес Досаев қатаң сөгіс алса, бір күннен соң Саран қаласының әкімі Еркін Баулықов қызметінен босатылды. Қала әкімінің міндетін уақытқа Мақсат Қайрешов атқарады.
Оқи отырыңыз: Таразда тұрғындар жарық пен жылудың жоқтығына шағымданды
