Тоқаев Өзбекстан президентін туған күнімен құттықтады

24 шілде 2024, 14:40 Авторға хат жазу قازاقشا Qaz

Тараптар жоғары деңгейдегі байланыстардың алдағы кестесін пысықтады.

Мемлекет басшысы Қасым-Жомарт Тоқаев Өзбекстан президентімен телефон арқылы сөйлесті, деп хабарлады Ақорданың баспасөз қызметі.

Әңгімелесу барысында Қасым-Жомарт Тоқаев Шавкат Мирзиёевті туған күнімен құттықтап, оған бақ-береке және Өзбекстан халқының игілігі жолындағы жауапты қызметіне табыс тіледі.

Қасым-Жомарт Тоқаев Қазақстан мен Өзбекстан арасындағы достық, тату көршілік және одақтастық қатынастарын нығайтуға Шавкат Мирзиёевтің қосқан зор үлесін жоғары бағалайтынын жеткізді.

Оқи отырыңыз: Өзбекстан Қазақстанға Сырдария өзені арқылы 4 млрд текше метр су жіберді

Президенттер екіжақты өзара ықпалдастықтың жоғары қарқынын атап өтіп, сауда-экономикалық, көлік-логистикалық, энергетикалық және мәдени-гуманитарлық салалардағы ынтымақтастықты арттырудың перспективаларын талқылады.

Тараптар аймақтық және халықаралық күн тәртібіндегі өзекті мәселелерді қарастырды. Сонымен қатар жоғары деңгейдегі байланыстардың алдағы кестесін пысықтады.