Тоқаев айтқан "Екінші республика" ұғымы нені білдіреді?

Мемлекеттік хатшы Ерлан Қарин түсініктеме берді.

Мемлекет басшысы бастама еткен саяси реформалар биыл жүзеге асырылады. Бұл туралы ҚР Мемлекеттік хатшысы Ерлан Қарин мәлім етті, деп хабарлады ҚазАқпарат агенттігі.

"Алматылықтарды Наурыз мейрамымен құттықтау кезінде Президент жаңа анықтама – "Екінші республика" жайында айтты. Осыған байланысты кейбір сарапшылар бұл түсініктің астарында не жатыр және бұған дейін жарияланған "Жаңа Қазақстан" концептісіне оның өзара қатысы қандай деп сұрақ қойып жатыр. Шын мәнінде, осы екі идеологеманың мәні бір, яғни тек акценттерінде ғана айырмашылық бар. Жаңа Қазақстан – ол жалпы біздің елдің болашағының образы", – деп жазды Ерлан Қарин.

Оның айтуынша, бұл тұрғыда қоғамдық құндылықтарды жаңарту мен ұлттың жаңа сапасын қалыптастыру қажеттігі туралы сөз қозғалып отыр. Сәйкесінше, еліміз қаңтар оқиғасы немесе Жолдаудан кейін бірден автоматты түрде Жаңа Қазақстанда өмір сүре бастады дегенді білдірмейді.


Оқи отырыңыз: Айдос Сарым: Мақсат – саяси алаңды жаңартып, жаңа ойыншыларға мүмкіндік беру


Жаңа Қазақстанды құру бір сәтте іске аса қоймайды. Бұл – өз кезегінде қоғамдық трансформацияның терең және ұзақ процесі.

"Сонымен бірге, Президент Жолдауда саяси реформалардың жаңа басымдықтарын жариялағаннан кейін, билік институттары арасында жаңа конституциялық теңгерімді қалыптастыру туралы сөз қозғалып отырғаны көпшілікке түсінікті болды. Бірінші кезекте ол басқарудың суперпрезиденттік үлгісінен мықты Парламенті бар президенттік республикаға біржола көшу бастамасына қатысты. Мемлекет басшысының биылғы Жолдауын жүзеге асыру аясында Конституцияның 30-дан астам бабына өзгеріс енгізу және 20-дан астам заңды қабылдау ескерілген. Бұл – реформалардың өте ауқымды жоспары. Белгіленген жаңарулар саяси жүйенің барша конфигурациясын елеулі түрде өзгертеді", – деді мемлекеттік хатшы.

Осы орайда ол азаматтардың мемлекетті басқаруға қатысуын кеңейтуге, жаңа саяси мәдениетті қалыптастыруға екпін қойылып отырғанын атап өтті.

"Жалпы, тек мемлекеттік басқару моделін ауыстыру басталғаны жайында ғана емес, сонымен қатар мемлекеттік әрі қоғамдық парадигманың өзгеруі туралы айтуға болады. Бүгінде осы процесті нақты белгілеу үшін Президент "Екінші республика" анықтамасын пайдаланды. Бұған қоса, Екінші республика – ол әбден жақын әрі айтарлықтай сезіліп тұрған мақсат. Себебі Мемлекет басшысы бастама еткен саяси реформаларды жүзеге асыру осы жылдың ішінде жоспарланған. Жаңа Қазақстан – қоғам мен ұлттың жаңаруы болса, ал Екінші республика – мемлекеттік үлгінің жаңаруы", – деп түсіндірді Ерлан Қарин.

Жаңалықты жарнамасыз оқыңыз. iOS және Android жүйесіне арналған informburo.kz мобильді қосымшасын жүктеңіз.

Бөлісу:

  Егер мәтінде қате болса, оны белгілеп, Ctrl+Enter батырмасын басыңыз

  Егер мәтіндегі қатені смартфонда көрсеңіз, оны белгілеп, «Қатені хабарлау» батырмасын басыңыз

Серіктестер жаңалықтары