Тәжікстанда бақсы-балгерлердің өзіне ғана емес, көмегіне жүгінген тұрғындарға да айыппұл салынады, деп хабарлады 31 арнаның Информбюро ақпараттық бағдарламасы.
Осылайша, билік сиқыр әлемін түп-тамырымен жоюды көздеп отыр. Мәселенің ауқымы расымен алаңдатарлық. Тек осы жылдың ішінде 500-ге жуық сиқыршылық қызметі әшкереленген.
Үкімет көріпкелдермен бірнеше жылдан бері күресіп келеді. Оларды жаппай ұстап, айыппұл да салынған. Бірақ, айтарлықтай нәтиже бермеген сыңайлы.
Енді болашағын білгісі келіп, бақсы-балгерлерге барған тұрғындарды да жазаға тартпақ. Жаңа ережеге сәйкес, көріпкелдердің қызметін қолданғандарға 375-тен бастап, 750 сомониға дейін, яғни 18 мыңнан 38 мың теңгеге дейін айыппұл салынады. Сиқырға сенім енді қалтаға салмақ салатын қателікке айналмақ.