Астанада Қазақстан Республикасы Құрылтайының бірінші шақырылымының алғашқы сессиясы басталды. Отырысқа мемлекет басшысы Қасым-Жомарт Тоқаев қатысып жатыр.
Президент сессияның ашылуында сөз сөйлеп, Құрылтайдың жұмысын еліміздің дамуындағы тарихи кезең деп атады.
Тоқаевтың айтуынша, Қазақстан халқы жалпыұлттық референдумда қолдаған жаңа Конституцияға сәйкес еліміздің бір палаталы заң шығарушы органы – Құрылтай ресми түрде жұмысын бастады. Мемлекет басшысы Құрылтайдың алғашқы сессиясының ашылуын Қазақстан үшін маңызды тарихи оқиға деп бағалады.
"Бүгін еліміз өзінің даму жолында аса маңызды кезеңге аяқ басты. Бұл – мемлекетіміз үшін мән-мағынасы айрықша оқиға, тарихи сәт. Біз ұлт жылнамасының жаңа парағын ашып отырмыз", – деді Қасым-Жомарт Тоқаев.
Президент Құрылтай атауының қазақ тарихында айрықша мәні болғанын атап өтті. Оның айтуынша, бұрын Құрылтайда мемлекеттік маңызы бар мәселелер кеңінен талқыланып, ортақ шешімдер қабылданған.
Тоқаев жаңа институттың мемлекеттік басқару жүйесінде маңызды рөл атқаратынын айтты.
"Құрылтай билік жүйесін түбегейлі жаңғыртады, бүкіл мемлекеттік аппараттың жұмысына тың серпін береді. Құрылтай ұлттық заңнама сапасын арттыру арқылы еліміздің құқықтық негізін нығайта түседі", – деді президент.
Мемлекет басшысы Құрылтайдың бірінші шақырылымының депутаттарына үлкен жауапкершілік жүктеліп отырғанын атап өтті.
"Осы тарихи миссияны атқару сіздерге жүктеліп отыр. Құрылтайдың бірінші шақырылымының депутаты болу – ең алдымен, ерекше сәт. Бұл – үлкен бақыт деп айтсақ, қате болмас. Осы аса абыройлы атқа сай лайықты қызмет етесіздер деп сенемін!", – деді Қасым-Жомарт Тоқаев.
Құрылтайдың алғашқы сессиясы Қазақстанның жаңа бір палаталы заң шығарушы органының жұмысын бастағанын білдіреді.