Қазақстан футбол федерациясы Талғат Байсуфиновтың Қазақстан ұлттық құрамасының бас бапкері қызметінен кету туралы шешімін қарап, оны қабылдады. Бұл туралы федерацияның баспасөз қызметі хабарлады.
"Команда тізгініндегі жұмысы барысында Талғат Байсуфинов құрамадағы барлық кезеңдері арасында ең үздік нәтижені көрсетті. Оның ішінде әлем чемпионатының іріктеу кезеңінде Бельгиямен өз алаңымызда тең түсті. Оның жетекшілігімен команда өз күшіне деген сенімділікті қайтарып, ФИФА рейтингіндегі орнын жақсартты. ҚФФ Талғат Маруаұлына кәсібилігі, ісіне деген адалдығы және Қазақстан ұлттық құрамасының дамуына қосқан елеулі үлесі үшін алғыс білдіреді, сондай-ақ оған алдағы кәсіби қызметінде сәттілік тілейді", – делінген ресми хабарламада.
Федерация бапкерлер штабын жасақтау бойынша алдағы қадамдар туралы қосымша хабарлайды.
Ал әзірге ұлттық құраманың алдағы матчтарға дайындығы қалыпты форматта жалғасады.
