Шымкентте кәсіп бастауға қалай мемлекеттік грант алуға болады? Шағын нұсқаулық

Шымкентте биыл мемлекеттік грантқа өтінім беру мамыр айында басталады. Бұл туралы Шымкент әкімдігінің сайты хабарлады.

Өтінімдер конкурс өткізу туралы хабарландыруда көрсетілген мерзімдерде Kezekte.kz сайтында қабылданады. Былтырғыдан қарағанда биылғы шартта өзгерістер бар. Мұқият қарап, құжаттарды соған сәйкес дайындау қажет.

Өтінім берген кезде келесі құжаттардың pdf форматындағы сканерленген көшірмелерін тіркеу керек:

• жалдамалы жұмыскерлердің орташа саны туралы анықтама (бар болса);
• кәсіпкердің "Бастау бизнес" жобасы бойынша кәсіпкерлік негіздерін оқығанын растайтын құжаттың көшірмесі (мерзімі үш жылдан аспауы керек;
• ұсынылатын мемлекеттік грант көлемінің кемінде 20% мөлшерінде бизнес-жобаны іске асыруға арналған шығыстарды қоса қаржыландырудың (ақшалай қаражат, жылжымалы не жылжымайтын мүлік) болуын растайтын құжаттар, кәсіпкердің ағымдағы шотында ақшалай қаражаттың болуы туралы банктік шоттан үзінді көшірме немесе жылжымалы және жылжымайтын мүліктің бағалау құнын растайтын құжаттар немесе бизнес-жобаға қатысатын жылжымайтын мүлік;
• жеке кәсіпкерді тіркеу туралы хабарламаның көшірмесі (ақпараттық жүйелерден мәліметтер түспеген жағдайда).

"2021-2025 жылдарға арналған кәсіпкерлікті дамыту жөніндегі ұлттық жоба" шеңберінде жаңа бизнес-идеяларды іске асыруға мемлекеттік гранттар сәуір-мамыр айларында өткізіліп келеді. Өтінім берген 468 адамның ішінде 56 кәсіпкер қолдау тапқан.