2023 жылдың наурыз айынан бастап инфляция деңгейі төмендейді. Бұл туралы премьер-министр Әлихан Смайылов Үкімет отырысын кейін өткен брифингте айтты.
"Халықаралық сарапшылар биыл жалпы дүние жүзінде инфляция қарқыны баяулайды деп болжап отыр. Ол бізге де әсерін тигізеді. Бірінші тоқсан шеңберінде жылдық инфляция өзінің шегіне жетеді деп ойлаймыз. Ары қарай наурыз айынан бастап инфляция деңгейі едәуір төмендейді деп күтеміз. Жылдың қорытындысы бойынша, инфляцияны 9,5 пайыз шеңберінде сақтаймыз деген мақсат қойып отырмыз", – деді Үкімет басшысы.
Оқи отырыңыз: Тоқаев: Үкімет пен Ұлттық банк 2023 жылы инфляцияны ауыздықтауы тиіс
Әлихан Смайылов жыл соңына дейін экономикалық өсімді кем дегенде 4 пайызға көтеру жоспары бар екенін айтты. Сонымен қатар Үкіметтің алдағы жоспарларын бөлісті.
"Индустрия саласында жалпы көлемі 1,1 трлн теңгеге 150 инвестициялық жобаны іске асырамыз. Ауыл шаруашылығы аясында 265 инвестициялық жобаны 540 млрд теңгеге іске асырамыз. Жалпы 400 мыңнан астам тұрақты жұмыс орнын құрамыз және 1 млн-ға жуық адамды жұмысқа орналастырамыз. Тікелей шетелдік инвестицияның көлемі кем дегенде 24,4 млрд долларды құрайды деп күтудеміз", – деді премьер-министр.
Оқи отырыңыз: Алтай Көлгінов: Бағаның көтерілуіне импортқа тәуелділігіміз себеп болып отыр
Сондай-ақ, Әлихан Смайылов биыл да геосаяси ахуал қиын болып сақталатынын айтып, Үкімет әртүрлі сценарийге дайын екенін жеткізді.
