СҚО-да су тарту үшін қазылған шұңқырлар мал қорымына айналған

Солтүстік Қазақстан облысы Тайынша ауданының Ильичевка ауылына су құбырын тарту үшін арнайы шұңқырлар қазған мердігер компания бюджеттен 1 миллиард теңгеден артық қаржы алған. Алайда тұрғындар жұмыстың тоқтағанына жарты жыл болғанын айтады. Бұл аралықта қазылған шұңқырларға құлап мертіккен мал саны аз емес, деп хабарлады 31 арнаның Информбюро ақпараттық бағдарламасы.

Қыс жақындағалы тұрғындардың уайымы күшейген. Қар басып, жердің шұңқыры білінбей қалатын кезде оған малдан бөлек, балалар құлап, мертіге ме деп алаңдайды.

"Жұмыстың нәтижесі жоқ. Бүкіл көшені шұңқыр етіп қазып, тастап кетті. Оны неге жаппайтынын сұрасақ, жауабын беретін ешкім жоқ", – дейді ауыл тұрғыны Мәншүк Зардхан.

---

Оқи отырыңыз: СҚО-да айыппұл тұрағындағы көліктер 500 мың теңге бастапқы бағамен сатылып жатыр

---

Дегенмен, мердігер компания болса, жұмыстың тоқтамағанын, ал шұңқырлардың уақытыл көмілмеуін бетон сақина өндірісінің үлгермеуімен байланыстырып айтып отыр.

"Жұмысты тастап кеткен жоқпыз. Жұмыс жоспар бойынша жүріп жатыр. Шұңқырлар жабылмай жатқан себебі, қазір бар жерде құрылыс қызу жүріп жатқандықтан, бетон сақина жасайтын кәсіпорындар үлгермей жатыр", – деп түсіндірді мердігер өкілі Жасұлан Тұрғанбаев.

Ал Ильичевка құрамына кіретін Амандық ауылдық округінің әкімі Нариман Тасымов мердігерге ескерту жасалғанын және олардың олқылықтарды түзеуге уәде еткенін айтты. Оның сөзінше, жоба екі жылға жоспарланғанмен, ауыл ішіне қазылған шұңқырлар қазан айының аяғына дейін жабылады.