Шілде айында 20 мың отбасына 500 миллион теңгенің азық-түлігі таратылады

1 шілдеден бастап "Ел тірегі – Елбасы" акциясы тағы бір рет өтеді. Бұл туралы "Халық" қайырымдылық қорының қамқоршылар кеңесі хабарлады. 

Акция шеңберінде 20 мың отбасына қолдау көрсетіледі. Оларға жалпы сомасы 500 млн теңге болатын 1 миллион килограмнан астам азық-түлік үлестіріледі. Соның ішінде әр отбасына 50 килограмнан күріш, қарақұмық, ұн, макарон, өсімдік майы, бұқтырылған ет, қант-шай және кәмпит беріледі. 

Азық-түлік себеттері қор бұрыннан көмек көрсетіп келген отбасыларға таратылады. Олар:

• қаржылай қиындыққа тап болған, аз қамтылған;
• көп балалы;
• ерекше қажеттілікке ие балалары бар отбасылар. 

"Ел тірегі – Елбасы" акциясына отандастарымыз өз үлесін қосты. Көптеген жұмыс жасалып, бірлескен күш-жігердің арқасында он мыңдаған отбасына қажетті азық-түлік жеткіздік. Бұл мүмкіндіктеріміздің шегі емес екенін білеміз! "Халық" қорының қайырымдылық акциясы 2021 жылы бірнеше рет өтеді. Еліміздің барлық азаматы мен кәсіпкеріне үндеу – ынтымақтастықта болыңыз, шет қалмаңыз, бізге қосылыңыз. "Ел тірегі – Елбасы" акциясын қолдайық. Бәріміз біріксек, қайырымды істер артады", – деді "Халық" ҚҚ қамқоршылар кеңесінің төрайымы Динара Кулибаева. 

Қор бастамасын еріктілер де қолдап, азық-түлік себеттерін отбасыларға дейін тасымалдауға көмектесті.