Шерзат Полаттың үйін өртеу ісі: Оқиға кезіндегі спутник суреттері қаралады

Құқық қорғау органдары марқұм Шерзат Полаттың отбасының үйін өртеу ісіне қатысты спутник суреттерін зерделеу үшін Ресей билігіне хабарласты, деп мәлімдеді Сенат отырысында бас прокурорының орынбасары Ғалымжан Қойгелдиев. Оның айтуынша, сотқа дейінгі тергеу әлі жүрып жатыр.

"Көптеген сараптама жүргізілді деп айта аламын. Бұл сараптамалардың белгілі бір нәтижесі бар. Қазіргі уақытта біз Ресей Федерациясына халықаралық тергеу комиссиясын жібердік. Істі толық тексеру үшін сол уақытта жақын жерде қандай көліктер тұрғанын спутник арқылы қарағымыз келеді", – деді Ғалымжан Койгелдиев.

Өткен жылдың 12 қазанына қараған түні Азат ауылында марқұм оқушының отбасы тұрған үй өртеніп кетті. Өрт орнынан канистр мен резеңке қолғап табылды.

16 жастағы Шерзат Полат 4 қазан күні төбелес кезінде алған пышақ жарақатының салдарынан қайтыс болды. 11 адам ұсталды. Кісі өлтіру ісі бойынша алдын ала тыңдау бүгін, 10 сәуірде Талдықорған қаласында өтеді.