Тікелей эфир

Серік Күдебаев Қазақстаннан кетіп қалған. Оған халықаралық іздеу жарияланды

Ол "Ауыр зардаптарға әкеп соққан қызметтегі әрекетсіздік" бабы бойынша айыпталған.

Алматы облысы ішкі істер департаментінің бұрынғы басшысы Серік Күдебаев сот үкімі шыққанға дейін Қазақстаннан кетіп қалған. Ақпаратты Жетісу облыстық сотының судьясы растады.

Судья Серік Күдебаевтың 23 наурызда Бішкектен Ыстамбұлға ұшып кеткенін айтты. Айыпталушыға халықаралық іздеу жарияланды.

Айта кетейік, 3 сәуірде Серік Күдебаев сотқа мәжбүрлеп әкелінуі тиіс еді, себебі сотталушы алдыңғы сот отырысына келмеген. Бұған дейін Серік Күдебаевтың ауруханаға жатқызылғаны, сол себепті Талдықорғандағы сот отырысына келе алмағаны жайлы ақпарат тараған еді.

Серік Күдебаев / Фото: Turkystan.kz

Еске салайық, Серік Күдебаев Алматы полиция департаментін 7 жыл басқарып, 2020 жылы Алматы облысы полициясының басшысы болып тағайындалды. Қаңтар оқиғасынан кейін, 2022 жылғы 18 ақпанда ішкі істер органдарынан өз еркімен қызметтен кетті.

Ал мамыр айында Бас прокуратура Серік Күдебаевтың қаңтар оқиғасына қатысы барын хабарлап, сотқа дейінгі тергеп-тексеру Қылмыстық кодекстің 370-бабының 4-бөлігінің 1-тармағы – "Ауыр зардаптарға әкеп соққан қызметтегі әрекетсіздік" бойынша жүргізілді. 

Біздің Telegram-каналдағы ең көп оқылған жаңалықтар
Серіктестер жаңалықтары