Семейде 4-сынып оқушысын жабылып ұрған балалардың қамқоршылары ата-ана құқығынан айырылды

Семейде төртінші сынып оқушысын бірнеше бала жабыла ұрып, қорлаған оқиға бойынша жаңа мәліметтер жарияланды. Абай облыстық сотының баспасөз қызметі таратқан ақпаратқа сәйкес, оқиғаға араласқан балалардың ата-аналарына қатысты ата-ана құқығынан айыру және шектеу туралы істер сотта қаралған.

Семейде болған мектеп оқушысын соққыға жығу оқиғасынан кейін ата-аналардың жауапкершілігі қаралып, сот бірнеше шешім шығарды. Ата-ана құқығынан айыру және оны шектеуге қатысты талап арыздар Абай облыстық кәмелетке толмағандар ісі жөніндегі мамандандырылған ауданаралық сотта қаралды.

Белгілі болғандай, кәмелетке толмаған оқушыға күш көрсеткен алты баланың ата-анасының үшеуі комиссияның шешіміне шағым түсірген. Қалған ата-аналарға қатысты сот отырыстары өтіп, нақты шаралар қолданылды.

Оқи отырыңыз: Бір аулада 54 орындық: Атыраулықтар шенеуніктердің әрекетіне шағымданды

"Сот шешімімен бір кәмелетке толмаған қыздың анасы ата-ана құқығынан айырылды. Тағы бір оқушының анасына қатысты талап арыз ішінара қанағаттандырылып, ал әкесінің ата-ана құқығы шектелді. Бұл шешім оның бала тәрбиесіне ұзақ уақыт араласпауы және алкогольді мөлшерден тыс қолдануы ескеріліп қабылданған", – делінген хабарламада. 

Сонымен қатар, кәмелетке толмағандардың ата-аналарынан алимент және мемлекеттік баж өндірілді. Қазіргі таңда қыз балалар қамқоршылық және қорғаншылық органдарының бақылауына алынған.