Бибісара Асаубаева шахматтан өткен Norway Chess Women 2026 халықаралық турнирінде мерзімінен бұрын 1-орын алды. Бұл туралы Спортты дамыту дирекциясының баспасөз қызметі хабарлайды.
25 мамырда басталған бәсеке (5 маусымға дейін) Осло қаласындағы (Норвегия) Deichman Bjørvika мәдени орталығында өтті. Жарысқа 4 елден (Қытай, Үндістан, Украина және Қазақстан) жиналған әлемнің ең мықты 6 шахматшысы қатысты.
Бибісараның қарсыластары:
- Цзюй Вэньцзюнь (Қытай) – қазіргі әлем чемпионы;
- Чжу Цзиньэр (Қытай) – әлем рейтингінде 2-орындағы шахматшы;
- Хампи Конеру (Үндістан) – әлем шахматының белді өкілі;
- Анна Музычук (Украина) – Norway Chess Women турнирінің былтырғы жеңімпазы;
- Дивья Дешмукх (Үндістан) – әлем кубогының иегері.
Оқи отырыңыз: Бір шахматшыға 388 млн теңге аз ба, көп пе? Шахматшы Бибісараның "бюджеті" неге дау тудырды
"Бұл турнир Бибісара үшін дебют болды. Соған қарамастан, ол турнир тарихындағы ең жас қатысушы болып отыр. Жарыс екі айналымды жүйеде өтті, яғни әр ойыншы бір-бірімен екі реттен ойнады. Классикалық партияда тең түскен жағдайда, жеңімпаз "Армагеддон" (міндетті түрде жеңімпазды анықтайтын ерекше ереже бойынша өтетін шешуші партия) арқылы анықталды", – делінген хабарламада.