Көрші елдің федералды қауіпсіздік қызметі Мәскеудегі синагогаға шабуыл жасағалы жатқан екі террористің көзі жойылғаны жайлы ақпарат таратқан еді. Көп ұзамай Қазақстанның Ұлттық қауіпсіздік қызметі екі адамның да Қазақстан азаматы екенін және шекараны кесіп өткенін растады, деп хабарлайды 31 арнаның Информбюро ақпараттық бағдарламасы.
Ресейлік БАҚ-тың дерегінше, күдіктілер «Вилаят Хорасан» ұйымының мүшелері болған. Терактіге Калужск облысында дайындалыпты. Олар тұрған үйден Макаров тапаншасы, Калашников автоматы және жарылғыш заттар әзірлеуге қажетті дүниелер табылған.
"Көрсетілген факті бойынша ҰҚК сотқа дейінгі тергеп-тексеру жүргізіп жатыр. Тексеріс ынтымақтастық арнасы аясында Ресей ФҚҚ-мен тығыз байланыста жүзеге асырылып отыр. Өзге ақпарат Қылмыстық-процестік кодекстің 201-бабы 1-бөлігіне сәйкес жария етілмейді", – деп жазды Ұлттық қауіпсіздік комитетінің баспасөз қызметі.
Оқи отырыңыз: Қызылорда мен Павлодар облыстарында "телефон террористері" ұсталды
