Қазақстанда пияз жоғары сұранысқа ие тауарға айналды. Бұл туралы Үкімет кулуарында Сауда және интеграция министрі Серік Жұманғарин айтты.
"Себебі, пиязбен айналысатын Өзбекстан, Пәкістан, Ресейде өндіріс жоқ. Қазір Мәскеу сөрелерінде пияз бағасы – 500 теңгеге, Өзбекстанда 350 теңгеге жеткен. Біздегі баға 170 теңгеге дейін өсті. Пияз тапшылығына жол берілмейді. Сондықтан сыртқы сауда бойынша ведомствоаралық комиссия үш айға пияз экспортына тыйым салды", – деді Серік Жұманғарин.
Оқи отырыңыз: Пияз бағасы неге қымбаттап жатыр? Министрлік түсіндірді
Министрдің айтуынша, қазақстандықтар ай сайын 30 мың тонна пияз тұтынады. Үш айға 90 мың тонна пияз қажет. Сол үшін министрлік Тәжікстаннан 3 мың тонна ерте пісетін пияз жеткізу туралы келісім-шарттарға қол қойды.
Журналистердің "Пияз бағасы қымбаттай ма?" деген сауалына министр: "Белгілі бір сомада өсуі мүмкін. Болжам жасай алмаймын. Бұл – өте субъективті сұрақ", – деп жауап берді.
