Қызылорда қаласының жолаушылар тасымалы заманауи автобустармен толығуда

Қызылорда қаласындағы жолаушылар тасымалындағы түйткілдерге байланысты нақты шаралар қолға алынып, аймақ басшысының тікелей қолдауымен заманауи үлгідегі автобустар алынғаны белгілі. Өткен жылдың өзінде қалаға 150 дана жаңа транспорт келіп, бұл қызметтің жұмысы жолға қойыла бастады. Дегенмен, облыс орталығындағы қоғамдық көліктердің қызметін жүйелеу үшін биыл тағы 150 дана автобус алуға тапсырыс берілді. Бүгінде оның алғашқы легі қалаға жеткізіліп, бағыттарға қосылды.  

"Бұл автобустардың сыйымдылығы өткен жылы әкелінген көліктерден үлкен. Барлық талаптарға жауап бере алады. Транспорт – салқындатқыш, қауіпсіздік құрылғылары және бейнекамералармен қамтылған. Мүмкіндігі шектеулі жандарға арнайы мінгізу мен түсіру аппараттары бар. Сонымен қатар, жолаушыларға, оның ішінде оқушыларға қажетті ақпараттар алуға арналған QR-код орналастырылған", – деді "Қызылорда автобус паркі" ЖШС директоры Мақсат Жүсіп. 

Күнделікті тасымалға бекітілген кестеге сәйкес 200-ден астам автобус шығады. Алдағы уақытта қала ішілік 34 бағытты толықтай үлкен сыйымдылықтағы автобустармен қамту жоспарлануда. Жолаушылар қоғамдық көліктердің аялдамаға келуін 2gis, Яндекс GO және "Яндекс Карта" ұялы қосымшалары арқылы көре алады.

"Жұмысыма, тұрмыстағы кейбір тіршіліктеріме қоғамдық көлікпен барамын. Автобустар кең, жылы, таза. Қолма қол төлемнің 130 теңге болатындығы алдын ала ескертілді. Сондықтан онлайн төлем жасауды үйреніп алдым. Карта аштырып, өзіме және балаларыма ақшасын енгіздім. Қазір өте тиімді әрі қолайлы. Өйткені, сөмке ақтарып, ақша іздеп жатпаймын, карта арқылы 85 теңге төлеп түсе беремін", – деді қала тұрғыны Зейнеш Айтхожаева.

Айта кету керек, осы жылдың 9 қыркүйегінен бастап үлкен сыйымдылықтағы бағыттарда сараланған тариф бойынша қолма-қол жол ақысы – 130 теңге, электронды төлем – 85 теңге, оқушыларға – 40 теңгемен бекітілді. Электронды түрде төлем жасаудың 8 түрі ұсынылды. Олар: SMS, QR код, ұялы қосымша, көлік және банктік карталарды қолданатын ұялы байланыс операторлары. Бұл арқылы жолаушылардың электорынды төлем жасауы 90 пайызды құрады.