Премьер-министр Олжас Бектенов Сенат депутаттарының сұрауына орай, қазақ халқының "Қырымның қырық батыры" эпостық жырын ЮНЕСКО-ның материалдық емес мәдени мұралар тізіміне енгізу ұсынысына жауап берді.
Олжас Бектеновтің айтуынша, ЮНЕСКО-ның ережелеріне сәйкес мемлекеттер өздерінің ұлттық номинацияларын Репрезентативтік тізімге екі жылда бір реттен артық ұсына алмайды. Ал биыл "Салбурын: тазы ертіп, бүркіт салатын атбегілер фестивалі" ұлттық номинациялық досьесі ЮНЕСКО-ның қарауына ұсынылған.
"Қырымның қырық батыры" эпостық жырын Репрезентативтік тізімге енгізу мәселесі қолданыстағы заңнама талаптарына сәйкес алдағы уақытта қарастырылады", – деген Олжас Бектеновтің жауабында.
Премьер-министрдің сөзінше, ЮНЕСКО-ның Адамзаттың материалдық емес мәдени мұрасының репрезентативтік тізіміне соңғы 10 жыл ішінде қазақ халқына тән 14 элемент енгізілді.
Айта кетейік, "Қырымның қырық батыры" эпопеялық жырын Мұрын жырау Сеңгірбекұлы жадында сақтап, кейінгі ұрпаққа жеткізген.
