Қазақстаннан 100 мыңға жуық еуро әкетпек болған италиялық азамат ұсталды

Астана әуежайында 98 мың еуроны заңсыз әкету әрекетінің жолы кесілді, деп хабарлайды Астана қаласының Мемлекеттік кірістер департаменті.

19 ақпанда "Әуежай – Астана" кеден бекетінде Астана – Ыстанбұл халықаралық рейсінің жолаушыларын тексеру кезінде Мемлекеттік кірістер департаментінің қызметкерлері Италия азаматын ұстады. Ол 98 мың еуроны заңсыз алып кетпек болған. Іс материалдары қылмыстық жауапкершілікке тарту мәселесін қарау үшін Астана қаласы Экономикалық тергеу департаментіне жіберілді.

Президент жарлығына сәйкес, Қазақстанда 10 мың доллар баламасынан асатын қолма-қол шетел валютасын және шетел валютасындағы ақша құралдарын әкетуге тыйым салынады. Норманы бұзу сомасына қарай әкімшілік немесе қылмыстық жауапкершілікке тартылады.

Оқи отырыңыз: Отызға жуық ителгіні Қазақстаннан Таяу Шығысқа шығармақ болғандар ұсталды