Қазақстанға Нидерландтан мотор майлары мен сұйықтықтары жеткізіле бастады

Қазақстан нарығына Valvoline мотор майларын жеткізуді бастады. Дистрибуциямен Orbis Kazakhstan құрамына кіретін Orbis Auto құрылымындағы "Auto Experts" ЖШС айналысады. Өнімдер корпоративтік клиенттер үшін көтерме жеткізілімдер арқылы, сондай-ақ дилерлік желі арқылы қолжетімді болады. Бұл – Orbis тобы үшін мотор майлары мен техникалық сұйықтықтар нарығындағы алғашқы қадам.

Valvoline өнімдерінің қатарында 360-тан астам өнім түрі бар. Олардың ішінде мотор және гидравликалық майлар, майлағыш заттар, салқындатқыш сұйықтықтар, арнайы техникаларға арналған майлар және басқа да өнімдер бар. Қазақстанға өнімдер тікелей Нидерландтағы зауыттан жеткізіледі. Топ жыл сайын шамамен 2 миллион литр мотор майлары мен техникалық сұйықтықтарын сатуды жоспарлап отыр. Оның бір бөлігі топтың ішкі қажеттіліктері үшін пайдаланылады. 

"Біздің мақсатымыз – тек өнім түрлерін көбейту емес, сонымен қатар Қазақстандағы бизнес үшін тиімділікті арттыруға арналған құрал ұсыну. Бұл – ең күрделі жағдайларда да сенімді жұмыс істейтін май. Біз жүк көліктері мен арнайы техника иелерінің қандай қиындықтарға тап болатынын жақсы түсінеміз және біздің өнім сол қиындықтардың нақты шешімі болатынына сенімдіміз", – деді Қазақстандағы Valvoline дистрибуциясының директоры Пётр Юн.

Оқи отырыңыз: Қазақстан нарығына қытайлық тағы бір автомобиль бренді келеді