Қазақстандағы әрбір бесінші мектепте әлі күнге дейін дебат клубы ұйымдастырылмаған

Республика бойынша 1 557 мектеп пен 153 колледжде дебат клубтары ұйымдастырылмаған. Студенттер әкімшілік тарапынан қолдаудың аз болғанын айтып отыр, деп мәлімдеді "Республикалық қосымша білім беру оқу-әдістемелік орталығы" РМҚК директоры Раиса Шер.

"Республикада жалпы 7 550 мектептің 1 557-сінде әлі күнге дейін дебат клубы ашылмаған. Соның ішінде Ақмола облысында – 218, Шығыс Қазақстан облысы – 248, Жамбыл облысы – 154, Батыс Қазақстан – 127, Қостанай облысы – 103, СҚО – 189, Түркістан облысының 187 мектебінде дебат клубы ұйымдастырылмаған. Аудандық координаторлар мектеп клубтарының жетекшілерін дайындау және оқушыларды дебатқа тарту бойынша тиісті жұмыстар жүргізбеген", – деді Раиса Шер. 

Мұнымен қатар РМҚК директоры колледждердің 20 пайызға жуығында дәл осындай клубтар ұйымдастырылмағанын атап өтті. 786 колледждің 153-інде клуб жоқ. 

Оқи отырыңыз: "Дарын" атын жамылған оқу орталықтарының жұмысы тексеріледі

"Себептің неде екені түсініксіз. Шығыс Қазақстан облысының 50 колледжінде, Ақмола облысы – 11, Павлодар облысы – 12, Алматы қаласының 49 колледжінде дебатқа қатысты тиісті жұмыстар ұйымдастырылмаған. Колледж студенттері әкімшілік тарапынан клуб жетекшілерін дайындау, мектеп пен колледждерде парламент құру бойынша шараларды ұйымдастыруға тиісті деңгейде қолдау көрсетілмегенін айтып отыр. Әрине, барлық өңірде бірдей емес", – деп қосты орталық директоры.