Елде жер учаскелері аукцион арқылы сатылады

Елде жер учаскелерін сатып алу бойынша жаңа пилоттық жоба енгізіледі, деп мәлімдеді "Азаматтарға арналған үкімет" мемлекеттік корпорациясының басқарма төрағасы Сүйеніш Әбділдин.

"Жер учаскесін алу процесін жеңілдету үшін кадастрлық карта әзірледік. Талқылау кезінде қоғам пікірі ескеріледі. Картада жер учаскелеріне қатысты барлық ақпарат көрсетіледі. Жылжымайтын мүліктің бірыңғай мемлекеттік кадастры аясында жер учаскелерін egov.kz порталында аукцион арқылы ұсыну пилоттық жобасы іске қосылды", – деді Сүйеніш Әбділдин.

Мұнымен қатар, басқарма басшысы пилоттық жоба аясында алғашқы жер учаскесінің аукцион арқылы сатылып үлгергенін айтты. 

Оқи отырыңыз: Тегін 10 сотық жер алуға енді eGov.kz арқылы өтініш беруге болады

"Ақтөбедегі жер учаскесі бастапқыда 51 480 теңгеден басталып, аукцион нәтижесінде 6 647 611 теңгеге сатылды. Осылай бірнеше есе қымбат бағаға сатылып, түскен пайда мемлекет қазынасына жіберілмек. Бұл жоба сыбайлас жемқорлықты жоюға көмектеседі. Мұнымен қатар, қызмет көрсету мерзімін жарты жылдан бір айға дейін қысқартуға мүмкіндік береді. Маусым айында аталған жобаны елдің барлық өңіріне енгізу жоспарланып отыр", – деді Сүйеніш Әбділдин.