Қазақстанда зейнетақы жинақтарын доллармен сақтауға болмайды. Бұл туралы БЖЗҚ басқарма төрағасы Жанат Құрманов айтты.
"Қазақстандағы ақша бірлігі теңге болып табылады, республика аумағындағы ақшалай міндеттемелер теңгемен көрсетілуге тиіс. Міндетті зейнетақы жарналары ұлттық валютада төленеді. Осыған сүйене отырып, зейнетақы жинақтарын басқа валюталарда сақтау мүмкін емес", – деді Жанат Құрманов.
Ол инвестициялық табыс алу үшін Ұлттық банк пен басқа басқарушылар зейнетақы активтерін Қазақстанда және шетелде экономиканың түрлі секторларында және түрлі валюталарда орналастыратынын айтты. Қазір инвестициялық портфельдегі құралдардың шамамен 40 пайызы валютада, негізінен доллармен номинацияланды.
"Зейнетақы жинақтары-бұл ұзақ мерзімді инвестициялар және инвестициялық кірістің мөлшерін кем дегенде бір жыл ішінде талдаған жөн. Апта сайынғы және ай сайынғы деректер индикативті болып табылмайды, өйткені олар нарықтық конъюнктураның тұрақты өзгеруіне байланысты", – деп атап өтті Құрманов.
