Қазақстанда ерекше мәртебесі бар жоғары оқу орындарының тізімін Қазақ ұлттық су шаруашылығы және ирригация университеті толықтырады. Бұл ұсыныс мемлекет басшысы Қасым-Жомарт Тоқаевтың қарауына енгізіледі.
Қазақ ұлттық су шаруашылығы және ирригация университеті өз жұмысын Тараз қаласында биылғы 1 қыркүйекте бастайды. Ол "М.Х. Дулати атындағы Тараз өңірлік университеті" коммерциялық емес акционерлік қоғамын екіге бөлу жолымен құрылды.
ҚазҰСШИУ-ға 2024-2025 жылдарға 245 орынға арналған мемлекеттік білім беру тапсырысының нысаналы квотасы (бакалавриатқа – 210, магистратураға – 20, докторантураға – 15) бөлінді.
Оқи отырыңыз: Таразда Ұлттық су шаруашылығы және ирригация университеті ашылады
Еске салайық, Қазақстанда қазіргі таңда ерекше мәртебеге ие 16 ЖОО бар. Олар:
- Әл-Фараби атындағы қазақ ұлттық университеті;
- Гумилев атындағы Еуразия ұлттық университеті;
- Қазақ ұлттық аграрлық университеті;
- Сәтбаев атындағы Қазақ ұлттық техникалық зерттеу университеті;
- Асфендияров атындағы Қазақ ұлттық медициналық университеті;
- Жүргенов атындағы Қазақ ұлттық өнер академиясы;
- Құрманғазы атындағы Қазақ ұлттық консерваториясы;
- Қазақ ұлттық өнер университеті;
- Абай атындағы Қазақ ұлттық педагогикалық университеті;
- ҚР Президентiнiң жанындағы Мемлекеттiк басқару академиясы;
- ҚР Бас прокуратурасының жанындағы Құқық қорғау органдары академиясы;
- ҚР Жоғары Сот Кеңесінің жанындағы Сот төрелігі академиясы;
- Қазақ ұлттық хореография академиясы;
- ҚР Ұлттық қорғаныс университеті;
- Қазақ ұлттық қыздар педагогикалық университеті;
- Қожа Ахмет Ясауи атындағы Халықаралық Қазақ-Түрік университеті.
