Қазақстанда шегірткеге қарсы күреске 50-ден астам дрон жұмылдырылды

50-ден астам дрон шегіртке зиянкестеріне қарсы күреске жұмылдырылды, деп хабарлайды Ауыл шаруашылығы министрлігі.

Министрліктің мәліметінше, былтыр Қазақстанда үйірлі шегіртке 2,5 млн гектар аумақты қамтиды деп болжанған. Алайда күрес шаралары нақты түрде 3,1 млн гектар жерді қамтыды. Химиялық өңдеулер барысында 423 бүріккіш техникасы қолданылды.

"Пестицидтер мен қызметтерді мемлекеттік сатып алу кезінде 694 млн теңге көлемінде үнемделген бюджет қаражаты есебінен 7 барлау дроны, 46 химиялық өңдеуге арналған дрон және 68 автокөлік сатып алынды. Түркістан және Жамбыл облыстарында шегіртке ошақтарын анықтауда барлау дрондары жоғары тиімділікті көрсетті", – деп хабарлады агроөнеркәсіптік кешендегі мемлекеттік инспекция комитеті.

Химиялық өңдеуге арналған агродрондар Ақмола, Алматы, Атырау, Батыс Қазақстан, Қарағанды, Қостанай, Қызылорда, Түркістан және Жамбыл облыстарында, сонымен қатар Абай және Жетісу облыстарында қолданылады.

Баспасөз қызметінің мәліметінше, Түркістан және Жамбыл облыстарында дрондармен мың гектардан астам жер өңделді. Қолданылатын технология қысқа мерзімде және жоғары дәлдікпен жұмыс жүргізуге мүмкіндік береді.