Мәжіліс Қазақстан мен Қырғызстан үкіметтері арасындағы Ыстықкөл облысындағы жер телімдерін жалға алу туралы келісімді ратификациялады. Құжат Қазақстан тарапының міндеттемелерін нақтылауды көздейді.
Аталған келісім 2009 жылғы 1 желтоқсанда Астанада қол қойылған. Оған сәйкес, Қазақстан тарапы Қырғыз Республикасының Ыстықкөл облысы аумағындағы бірқатар жер телімдерін 49 жыл мерзімге жалға алған. Бұл жерлерде "Қазақстан" шипажайы, әл-Фараби атындағы ҚазҰУ-дың "Университет" спорттық-сауықтыру лагері, "Самал" демалыс үйі және "Олимп" орталығының спорттық-сауықтыру базасы орналасқан.
Құжат 2006 жылғы 4 шілдеде Астанада қол қойылған Қазақстанның Ыстықкөл облысындағы курорттық-рекреациялық нысандарға меншік құқықтарын реттеу туралы келісімде көзделген міндеттемелердің орындалуын бекітеді.
Мәжіліс отырысында қаржы министрі Мәди Такиев бұл мәселеге түсініктеме берді. Оның айтуынша, аталған нысандардың астындағы жер Қырғызстанның меншігінде қала береді.
"2006 жылы қол қойылған келісім сол кезеңдегі заңнамалық нормаларға байланысты ратификациядан өтпеген. Ол кезде үкіметаралық келісімдер ішкі мемлекеттік келісу рәсімінен өтіп, ратификациялауға жатпайтын. Кейін 2011 жылы "Мемлекеттік мүлік туралы" заң қабылданды, сондықтан бұл құжат ұзақ уақыт бойы сәйкестендірілмей келді. Нысандарды пайдалану бойынша белгілі бір жұмыстар жүргізілгенімен, келісімде көзделген жөндеу, инвестиция тарту және нысандарды тиісті жағдайға келтіру мақсаттары толық орындалмады", – деді министр.