"Қарап тұрғандар бар". Ералы Тоғжанов әнұранды дұрыс айтпағандарды сынға алды

Гимн айтылып жатқанда жанымызды салып айтуымыз керек, деді премьер-министрдің орынбасары Ералы Тоғжанов "Адами капитал – жаңа Қазақстан дамуының негізгі ресурсы" атты ғылым және жоғары білім форумында.

"Гимн айтылып жатқан кезде қарап тұрмын. Гимнде қолын салып тұрғандар да болды, жүрегімен айтып тұрғандар да болды, қалғандары қалай айтады екен деп қарап тұрғандар да болды. Жүректі салу керек қой. Егер гимнге жанымызды салмайтын болсақ, оқу жүйесін басқарып отырған азаматтар, қандай тәрбие береміз? Жүрегіңізді салмайтын болсаңыз, сіздің бір қарасыңыздан-ақ, айтқан сөзіңізден-ақ үлкен студенттер тұрмақ, жай балалардың өзі жай әңгіме айтып тұрғаныңызды сезеді. Бір адамды алдай алмайсыз", – деді Ералы Тоғжанов.

Премьер-министрдің орынбасары ғылым және жоғары білім форумына қатысушыларды осындай дүниелерге мән беруге шақырды.

"Болашақта соның бәрін сіздерден сұраймын. Талай жерде жүресіздер, талай жерде елге ой айтасыздар. Ең адымен өзіміз осындай дүниеге бейім болуымыз керек", – деді Ералы Тоғжанов.