Президент Аймағамбетовке мектептегі білім беру сапасын күшейтуді тапсырды

ҚР білім және ғылым министрі Асхат Аймағамбетов мемлекет басшысына балалар құқықтарының бұзылу фактілерін азайту үшін жекеменшік балабақшалардың жауапкершілігін арттыруға және мектеп бағдарламалары мен оқулықтарды әзірлеудің жаңа тәсілдеріне қатысты ұсыныстар берді, деп хабарлайды Ақорда сайты. 

Асхат Аймағамбетовтің айтуынша, "Ғылым туралы" заңға өзгертулер енгізілген. Енді тарих, қазақ тілі, философия, археология, математика, шығыстану және басқа да салалар бойынша ғылыми зерттеу жұмыстарымен айналысып жүрген 4 мыңнан астам ғалым тұрақты еңбекақы алады. Бұдан өзге ғылыми жобаларды қаржыландыру мерзімі бұрынғы 3 жылдан 5 жылға дейін созылды.

"Жас ғалымдарды қолдау үшін постдокторантураға мың грант бөлінді. Арнайы конкурстар  басталды. Соның аясында 2 мыңнан астам жас ғалым 17 миллиард теңгенің грантын алды. Қасым-Жомарт Тоқаевтың тапсырмасы бойынша ғалымдардың әлеуетін арттыру шаралары қабылданды. Жыл сайын 500 отандық маман республикалық бюджет есебінен әлемнің жетекші ғылыми орталықтарында тағылымдамадан өтеді", – делінген хабарламада. 

Министрдің есебін тыңдаған президент мектептегі білім беру сапасы мен мұғалімдердің мәртебесін арттыру жөніндегі мақсатты жұмыстарды күшейтуді тапсырды.

Сонымен қатар мемлекет басшысы жоғары оқу орындарына лицензия беру тәртібін жетілдіру және іргелі зерттеу жұмыстарын жүргізетін институттарды қолдау қажет деп санайды.

---

Оқи отырыңыз: Мектеп оқушыларының ораза ұстағаны дұрыс па? 

---